काठमाडौं । पछिल्लो समय सेयर किन्ने ह्वात्तै बढेका छन् । सेयर कारोबार रकम बढेकोले पनि यसको पुष्टि गर्छ । गत साता चार दिनमा तीन अर्ब ३० करोडको सेयर कारोबार भएको छ । यो अघिल्लो साताको भन्दा निकै बढी हो । अघिल्लो साता दुई अर्ब ५० करोड रुपैयाँको मात्र सेयर कारोबार भएको थियो । गत साता लगानीकर्ताहरु प्रभु बैंकको सेयर खरिद गर्न तँछाडमछाड नै गरे ।
आकर्षक लाभांश दिने तयारी प्रभु बैंकले गर्दै छ भन्ने सुचना सेयर बजारमा फैलिएपछि उक्त बैंकको सेयर खरिद गर्न लगानीकर्ता झुम्मिएका हुन् । गत साता सो बैंकको २३ करोड ३६ लाख १० हजार बराबरको सेयर कारोबार भएको थियो । नेपाल स्टक एक्सचेञ्ज (नेप्से) परिसूचक बढेसँगै सेयर कारोबार पनि बढेको हो । अहिले लगानी गर्दा तत्कालै प्रतिफल पाउने त छदै छ, त्यसमा पनि निकै तल आएको सेयर बजार अब माथि जाने सम्भावना त्यतिकै देखिएकाले लगानीकर्ता खरिद गर्न आकर्षित भएका हुन् ।
गत साता कूल १८९ कम्पनीको एक करोड ६७ लाख ७२ हजार २४० कित्ता शेयर खरीद बिक्री भएको नेपाल स्टक एक्सचेञ्जले जनाएको छ । कारोवार रकम अघिल्लो साताको भन्दा २६ दशमलव शुन्य दुई प्रतिशतले बढी हो । अघिल्लो साता १८९ कम्पनीको ९० लाख ७० हजार ७७० कित्ता सेयर खरीद बिक्री भएको थियो । प्रभु बैंकपछि कारोबार भएको सेयर संख्याका आधारमा क्यपिटल मर्चेन्ट बैंक एन्ड फाइनान्स कम्पनी लिमिटेड संस्थापक अग्रस्थानमा छ । सो क्यापिटलको ३० लाख ८५ हजार कित्ता सेयर कारोवार भयो ।
२०७५ असोज १४ गते प्रकाशित
वि.सं.२०७५ असोज १४ आइतवार ०८:४९ मा प्रकाशित