काठमाडौं । अन्य कम्पनीको तुलनामा वाणिज्य बैंकको सेयर खरिद गर्दा बढी प्रतिफल पाइने आशाले लगानीकर्ताहरु अहिले वाणिज्य बैंकको सेयर खरिदमा लागेका छन् । यसैकारण गत साता सवैभन्दा बढी कारोबार पनि वाणिज्य बैंकको सेयरमा नै हुन पुगेको हो । वाणिज्य बैंकहरुले लाभांश घोषणा गर्ने तयारीमा रहेकाले पनि लगानीकर्ताको पहिलो रोजाइ वाणिज्य बैंकको सेयर पर्न गएको हो ।
दसैं पछि खुलेको गत साताको सेयर बजार मापक नेप्से सूचकमा सामान्य गिरावट आएपनि दैनिक कारोबार रकममा सुधार आएको छ । साताभर पुरै पाँच दिन कारोबार भएको बजारमा लगानीकर्ताको छनौटमा भने वाणिज्य बैंकहरु नै अग्रपंत्तिमा देखिए ।साताभर नेप्से झिनो अंकले ओरालो लाग्न पुग्यो । अघिल्लो साताको अन्तिम दिन बिहीबार १२४१.६३ अंकमा रहेको नेप्से सूचक गत साताको अन्तिम दिन बिहीबार १२४१.११ अंकमा आइपुगेको छ । गत साताभर नेप्से ०.५२ विन्दुले मात्र घटेको हो ।
साताको दुई दिन आइतबार र बुधबार बजार बढेपनि तीन दिन सोमबार, मंगलबार र विहिबार घटेको थियो । नेप्से घटेपनि दैनिक कारोबारमा सुधार हुँदै जादा पाँच दिनमा एक अर्ब एक करोड बढीको कारोबार भएको छ । गत साता वाणिज्य बैंकहरु लगानीकर्ताको पहिलो छनौटमा परे । उच्च कारोबार हुने र धेरै सेयर किनबेच हुने कम्पनीको दश सूचिमा वाणिज्य बैंकहरुको वर्चश्व देखिन्छ ।
रकम र सेयर संख्याका हिसाबले उच्च कारोबार हुने दश कम्पनीको सूचीमा वाणिज्य बैंकहरु मात्रै देखिएका छन् । सेयर मूल्य बिमा, लघुवित्त कम्पनीको भन्दा वाणिज्य बैंकहरुको कम, चालु आर्थिक वर्षको तीन महिनाको आर्थिक वित्तीय विवरण सार्वजनिक गर्ने तयारी र गत बर्षको लाभांश घोषणा गर्न बाँकी रहेकाले पनि बाणिज्य बैंकहरुमा लगानीकर्ताको आकर्षण देखिएको हो ।
कारोबार रकम र धेरै सेयर किनबेच हुनेमा प्रभु बैंकले सबैलाई उछिनेको छ । चालु आर्थिक बर्षको पहिलो त्रैमासमा उच्च प्रगति सहितको वित्तीय विवरण आउने हल्ला चलाइएपछि सेयरबजारमा प्रभुको कारोबार उच्च हुँदै आएको छ । प्रभु बैंकको यो साता १६ करोड ८० लाख रुपैयाँ बढीको सेयर किनबेच भयो । यसबीचमा प्रभुको ६ लाख ७३ हजार कित्ता सेयर किनबेच भएको छ । कारोबार कित्ताको हिसाबले पनि प्रभुले सबैलाई उछिनेको छ ।
यसपछि उच्च कारोबार हुने एनआइसी एशियाको ६ करोड ७० लाख बढीको सेयर किनबेच भयो । यस्तै कुमारी, मेगा, एनएमबी, सिद्धार्थ, जनता, माछापुच्छ्रे, सिभिल र प्राइम बैंक उच्च कारोबार गर्ने दश कम्पनीमा परेका छन् । धेरै कित्ता सेयर किनबेच हुनेमा पनि प्रभु बैंक नै परेको छ । प्रभुलाई कुमारी बैंकले पछ्याएको छ । कुमारीको २ लाख १७ हजार कित्ता किनबेच भएको छ । मेगा बैंक, एनआइसी एशिया, जनता, सिभिल, माछापुच्छ्रे, एनएमबि, सिद्धार्थ र सेञ्चुरी लगायतका बैंकहरुको धेरै संख्यामा सेयर किनबेच भएको छ ।
२०७५ कार्तिक ११ गते प्रकाशित
वि.सं.२०७५ कात्तिक ११ आइतवार ०९:१५ मा प्रकाशित