काठमाडौं । नेसनल लाइफ इन्सुरेन्सले कात्तिक १५ गतेदेखि २ लाख ७८ हजार ११९.३४ कित्ता सेयर लिलामी प्रक्रियाबाट बेच्ने भएको छ । कम्पनीले सर्वसाधारण समूहको सेयर बिक्री गर्न लागेको हो । लगानीकर्ताले लगानी गर्दा न्यूनतम १०० रुपैयाँलाई आधार मान्नुपर्ने हुन्छ । यसमा आवेदन दिने अन्तिम म्याद कात्तिक २६ गतेसम्म छ ।
यसमा बिक्री प्रबन्धक एनआइबिएल एस क्यापिटल लिमिटेड लाजिम्पाट काठमाडौं तथा यसका शाखा कार्यालय लालदरबार काठमाडौं, ललितपुर, पोखरा, बुटवल वीरगञ्ज र विराटनगरबाट पनि आवेदन दिन सकिनेछ । यसैगरी, नेपाल इन्भेष्टमेन्ट बैंकको नेपालगञ्ज, सुर्खेत, नारायणगढ र धनगढी शाखाबाट पनि आवेदन दिन सकिनेछ ।
कम्पनीले यसअघि साउन १ गतेदेखि भदौ १९ गतेसम्म ९९ लाख ३६ हजार ४७७.५ कित्ता हकप्रद सेयर बिक्री खुला गरेको थियो । जसमा ९६ लाख ५८ हजार ३५८.२० कित्ताका लागि मात्र आवेदन परेको थियो । २ लाख ७८ हजार ११९।३४ कित्ता हकप्रद बिक्री हुन सकेन । हकप्रद नबिकेको सेयर अहिले लिलामी प्रणालीबाट बिक्री गर्न लागिएको हो ।
हाल नेसनल लाइफ इन्सुरेन्सको चुक्ता पुँजी १ अर्ब ६५ करोड ६० लाख ७९ हजार ५९० रुपैयाँ छ । हकप्रद र बाँकी रहेको सेयर लिलामी बिक्रीपछि चुक्ता पुँजी २ अर्ब ६४ करोड ९७ लाख २७ हजार ३४४ रुपैयाँ पुग्नेछ ।
२०७५ कार्तिक १३ गते प्रकाशित
वि.सं.२०७५ कात्तिक १३ मंगलवार ११:०५ मा प्रकाशित