काठमाडौं । वाणिज्य बैंकहरुले गत आर्थिक वर्षको नाफाबाट धमाधम लाभांश घोषणा गर्न थालेका छन् । अहिलेसम्म ६ वाणिज्य बैंकहरुले गत आर्थिक वर्षको मुनाफाबाट लाभांश घोषणा गरिसकेका छन् ।
६ वाणिज्य बैंक मध्ये सबैभन्दा धेरै लाभांश घोषणा गर्नेमा एनएमबी बैंक परेको छ । उसले गत आर्थिक वर्षको नाफाबाट लगानीकर्तालाई ३० प्रतिशत लाभांश दिने घोषणा गरेको छ । एमएमबी बैंकले २० प्रतिशत नगद र १० प्रतिशत बोनस लाभांश दिने प्रस्ताव गरेको छ ।
दोस्रो बढी लाभांश दिने वाणिज्य बैंकमा एभरेष्ट बैंक परेको छ । विदेशी साझेदार उक्त बैंकले २० प्रतिशत नगद लाभांश दिने प्रस्ताव गरेको छ ।
त्यसैगरी, तेस्रो बढी लाभांश दिने बैंकमा स्टयाण्डर्ड चार्टर्ड बैंक परेको छ । उसले १७.५० प्रतिशत नगद लाभांश दिने प्रस्ताव गरेको छ । यसैगरी सानिमा बैकले १४ प्रतिशत नगद लाभाशं पारित गर्नका लागि साधारण सभाको सूचना सार्वजनिक गरेको छ । एनआइसी एशिया बैंकले १० प्रतिशत बोनस र माछापुच्छे बैंकले १० प्रतिशत नगद लाभांश वितरण गर्ने प्रस्ताव गरेका छन् ।
६ वटा बैंकमध्ये चार वटाले नगद लाभांश मात्रै दिने प्रस्ताव गरेका छन् । एउटा एमएमबी बैंकले नगद र बोनस, अर्को एनआइसी एशियाले बोनस सेयर मात्रै दिँदै छन् । लगानीकर्ताको चाहना बोनस सेयर पाउने हुन्छ । तर, त्यसको विपरित धेरै बैंकले नगद मात्र लाभांश दिन थालेका छन् । चुक्ता पुँजी राष्ट बैंकले तोकेको आठ अर्ब पुगिसकेकाले पनि बैंकहरुले नगद मात्र दिन थालेको बिज्ञहरुको भनाइ छ ।
विदेशी साझेदार बैंकहरुले नगद मात्रै लैजान चाहान्छन भने स्वदेशी लगानीमा स्थापित बैंकहरुले वोनस सेयरका साथै नगद लाभांश दिँदै आएका थिए । पछिल्लो समय चुक्ता पुँजी पुगिसकेकाले उनीहरुले पनि नगद लाभांश दिन थालेका छन् ।
२०७५ मंसिर ७ गते प्रकाशित
वि.सं.२०७५ मंसिर ७ शुक्रवार १०:५७ मा प्रकाशित
