काठमाडौं । नेपाल केबल टीभी महासंघले मंगलबार दिउँसो ३ बजेसम्मका लागि विदेशी च्यानलहरु बन्द गरेको छ । सरकारको क्लिन फिड नीतिको विरोध स्वरुप विदेशी च्यानलहरु बन्द गरीएको महासंघले जनाएको छ ।
महासंघले सोमबार दिउँसो ३ बजेदेखि २४ घन्टाका लागि विदेशी डीटीएच र भारतीय च्यानलहरु बन्द गरेको हो । टीभी सेवाप्रदायक कम्पनीहरुसँग सरकारले समन्वय नै नगरी र विनाअध्ययन विज्ञापनरहित च्यान सञ्चालन गर्ने नीति ल्याउन सरकारले अगाडि बढेकोले सांकेतिक विरोधस्वरुप २४ घन्टाका लागि विदेशी च्यानलहरु बन्द गर्नुपरेको महासंघले जनाएको छ ।
क्लिन फिड लागू गर्दा डिजिटल टेलिभिजन व्यवसायको लगानी धरापमा परेको महासंघको ठहर छ। नेपालमा प्रसारण हुने विदेशी च्यानलमा उतैका विज्ञापन राख्न बन्देज लगाउने नीति नै क्लिन फिड हो । संघीय संसदमा छलफलका क्रममा रहेको विज्ञापन नियमनसम्बन्धी विधेयकमा क्लिन फिड हुनुपर्ने प्रावधान राखिएको छ । नेपालमा हाल दुई सयभन्दा बढी विदेशी च्यानलहरु प्रसारणमा छन् । जुन नेपाल प्रसारित हुने च्यानलहरुको ८५ प्रतिशतको हाराहारीमा हुन आउँछ ।
विज्ञापनरहित विदेशी च्यानल बन्द गर्नुपर्दा नेपाली च्यानलबाट मात्रै टीभी व्यवसाय नचल्ने र ५० हजारभन्दा बढीले रोजगारी गुमाउने अवस्था आउने महासंघले जनाएको छ।
२०७६ असार १० गते प्रकाशित
वि.सं.२०७६ असार १० मंगलवार १३:४३ मा प्रकाशित