काठमाडौं । शेयर बजारमा बिक्री चाप बढेको छ । असार मसान्तमा कर्जाको सावाँ तथा व्याज तिर्नुपर्ने दबाबका बीच शेयर बजारमा बिक्री चाप बढेको हो । त्यससंगै नेप्से दोहोरो अंकले घटेको छ । नेप्से घटेपनि सस्तोमा शेयर उठाउनेहरु सक्रिय रहदा कारोबार रकममा भने सुधार आएको छ ।
साताको पहिलो दिन तथा असारको मध्यमा लगानीकर्ताहरुमा शेयर बिक्रीको मनस्थिति बन्दा कारोबार रकम ६४ करोड रुपैयाँ बढी पुग्यो । अधिकाँश कम्पनीको शेयरमूल्य उल्लेखनिय रुपमा घटेर नेप्से सूचक १२.२७ अंकले ओरालो लागेको छ ।
आइतबार कारोबारमा आएका ११ वटै उपसहुको सूचक नकारात्मक हुदाँ नेप्से दोहोरो अंकले घटेर १२४४.८९ विन्दुमा झरेको हो । यस दिन सबै भन्दा धेरै निर्जीवन बीमा समुहको सूचक ५९.९७ अंकले घटेको छ । यस्तै जीवन बीमाको ५८.२९, उत्पादन तथा प्रशोधन ३६.३८, माइक्रोफाइनान्स १५.३९, हाइड्रोपावर १३.१३, विकास बेंक १२.६९ र वाणिज्य बैंक ११.८५ अंकले नकारात्मक बनेको छ ।
आइतबार १७२ कम्पनीका २३ लाख ६१ हजार ५०० कित्ता शेयर किनबेच भएर ६४ करोड ५० लाख रुपैयाँ बराबरको कारोबार भएको छ। गत विहिबार ६२ करोड ७९ लाख रुपैयाँको कारोबार भएको थियो । पहिले देखि नै कमजोर देखिएको लगानीकर्ताको मनोबल बिक्री चापले झन कमजोर बनाएपनि सस्तोमा राम्रा कम्पनीहरुको शेयर किनेर लगानी विविधिकरण गर्दै जाने अवसर भने सिर्जना भएको छ ।
आइतबार ग्लोवल आईएमई बैंकको संस्थापक शेयर सबैभन्दा धेरै १० करोड ३८ लाख रुपैयाँ बराबरको कारोबार भएको छ । यस्तै नेपाल बैंकको ६ करोड ३९ लाख, शिवम सिमेन्टको ५ करोड ८० लाख रुपैयाँ बराबरको कारोबार भयो । प्रभु बैंक र एनसीसी बैंकको ३ करोड रुपैयाँ भन्दा बढीको कारोबार हुदाँ सिद्धार्थ बैंक, हिमालयन डिस्टीलरी र नविल बैंकको २ करोड रुपैयाँ बराबरको कारोबार भएको छ ।
यस दिन स्वाभिमान लघुवित्तको शेयरमूल्य ९.७१ प्रतिशतले बढेर शेयरमूल्यमा पोजेटिभ सर्किट लागेको छ । यस्तै मल्टिपर्पस फाइनान्सको ५.०४, अरुण काबेली पावरको ३.२८ , सिभिल लघुवित्तको २.१९ र युनिलिभर नेपालको शेयरमूल्य २ प्रतिशतले सुधार भएको छ ।
यता रैराङ्ग हाइड्रोपावरको शेयरमूल्य सबैभन्दा धेरै ६.९५ प्रतिशतले घटेको छ भने गुराँस लघुवित्तको पनि शेयरमूल्य ५.९२ प्रतिशतले घटेको छ । यस्तै शिवम सिमेन्ट, सिन्धु विकास बैंक, नेपाल एग्रो लघुवित्त लगायतको शेयरधनीले ४ प्रतिशत भन्दा बढीले गुमाएका छन् ।
२०७६ असार १५ गते प्रकाशित
वि.सं.२०७६ असार १५ आइतवार १७:०२ मा प्रकाशित
