काठमाडौं । आँधिखोला लघुवित्त वित्तीय संस्थाको आइपीओ असार ३० गते सोमबार बाँडफाँट हुने भएको छ । सोमबार बिहान ९ः३० बजे बिक्री प्रबन्धक एनआइबीएल एस क्यापिटलको कार्यालय लाजिम्पाट, काठमाडौंमा बाँडफाँट हुने तय भएको हो ।
आइपीओमा कुल ५४ करोड ५७ लाख ३४ हजार रुपैयाँ बराबरको आवेदन परेकोे छ । बिक्री प्रबन्धकका अनुसार कुल ३ लाख ८ हजार ४१४ जनाले ५४ लाख ५७ हजार ३४० कित्ताका लागि आवेदन दिएका छन् ।
यस आधारमा अन्तिम तथ्यांक हेर्दा माग भन्दा १४.५५ गुणा बढी आवेदन परेको देखिन्छ । कम्पनीले असार २२ गतेदेखि सर्वसाधारणका लागि ३ लाख ७५ हजार कित्ता सेयर बिक्री खुला गरेको हो । कुल ४ लाख कित्तामध्ये ५ हजार कित्ता कर्मचारी र २० हजार कित्ता म्युचुअल फन्डलाई सुरक्षित गरी बाँकी सेयर सर्वसाधारणमा जारी गरेको हो ।
चालु आर्थिक वर्षको अन्त्यसम्म १ करोड ३० लाख रुपैयाँ खुद नाफा कमाउने कम्पनीले जनाएको छ । यस्तै, आव २०७६.७७ मा खुद नाफा ३ करोड १५ लाख रुपैयाँ र आव २०७७.७८ मा ३ करोड ९९ लाख रुपैयाँ पुर्याउने प्रक्षेपण गरेको छ । आँधिखोलाले आइपीओ बिक्री गरी चुक्ता पुँजी १० करोड रुपैयाँ पुर्याउने छ । आइपीओबाट आएको रकममध्ये २ करोड रुपैयाँ पशुपालन तथा कृषि कर्जा, १ करोड रुपैयाँ खुद्रा व्यापार तथा सेवा कर्जा र १ करोड रुपैयाँ साना तथा घरेलु कर्जामा उपयोग गरिने योजना बनाएको छ ।
२०७६ असार २९ गते प्रकाशित
वि.सं.२०७६ असार २९ आइतवार १४:५४ मा प्रकाशित
