काठमाडौं । युनाइटेड इन्सुरेन्सको भदौ ३ गतेबाट ७२ करोड ५७ लाख ६० हजार रूपैयाँ बराबरको हकप्रद जारी गर्ने भएको छ । असोज ६ गतेसम्म यस हकप्रदमा आवेदन दिन सकिनेछ ।
युनाइटेडले १०० रुपैयाँका दरले कुल ७२ करोड ५७ लाख ६० हजार रुपैयाँ बराबरको हकप्रद निष्कासन गर्न लागेको हो । युनाइटेडले हाल कायम चुक्ता पुँजी ३० करोड २४ लाख रुपैयाँबाट उक्त हकप्रद निष्कासन गर्न लागेको हो । हकप्रद बिक्रीपछि चुक्ता पुँजी १ अर्ब २ करोड ८१ लाख ६० हजार रुपैयाँ पुग्नेछ । हकप्रद प्रयोजनका लागि कम्पनीले साउन १४ गते बुक क्लोज गरेको हो । साउन १३ गते सम्म कायम सेयरधनी मात्र हकप्रद भर्न योग्य हुनेछन् ।
युनाइटेड इन्सुरेन्सको सम्पूर्ण शाखा तथा बिक्री प्रबन्धक एनएमबी क्यापिटलबाट हकप्रदमा आवेदन दिन सकिनेछ । यस्तै, एनएमबी बैंकका कार्यालयहरुबाट पनि आवेदन दिन सकिनेछ । गुडविल फाइनान्सको कार्यालय हात्तिसार, डिल्लीबजार, इन्द्रचोक, कुमारीपाटी शाखाबाट फारम पाइनेछ । कुपन्डोल, चावहिल र च्याम्हासिंहको सेन्ट्रल फाइनान्सको शाखाबाट र सी–आस्वा सदस्यता लिएका बैंक तथा वित्तीय संस्थाहरुबाट हकप्रद भर्न पाइने पनि कम्पनीले जनाएको छ ।
हकप्रद बिक्रीपछि पुँजी संरचना संस्थापक र सर्वसाधारणको ६०ः४० अनुपातमा हुने कम्पनीले जनाएको छ । कम्पनीले जारी गर्ने हकप्रदलाई केयर रेटिङ्गस् नेपालले ‘केयर एनपि आईपिओ ग्रेड ४’ रेटिङ्ग प्रदान गरेको छ। ग्रेड ४ रेटिङ्गले कम्पनीको आधारभुत पक्ष औसत भन्दा तल आधार रहेको जनाउँछ।हकप्रद बिक्रीबाट प्राप्त हुने रकममध्ये सरकारी र सरकारको जमानत प्राप्त सेक्युरेरिटी, पब्लिक कम्पनीको साधारण सेयर, नेपाल पुनर्बीमा, वाणिज्य बैंक र बिकास बैंकको मुद्दति निक्षेप र अन्य केही क्षेत्रमा लगानी हुने कम्पनीको भनाई छ ।
२०७६ साउन १७ गते प्रकाशित
वि.सं.२०७६ साउन १७ शुक्रवार १०:४० मा प्रकाशित