लमजुङ । लमजुङमा विकास निर्माणका लागि संघ र प्रदेश सरकारबाट विनियोजित १ अर्ब ५० करोड रुपैयाँभन्दा बढी बजेट फिर्ता भएको छ ।
आर्थिक वर्ष २०७५(७६ मा संघ र प्रदेश सरकारले ७ अर्ब ७५ करोड ७९ हजार रुपैयाँ विनियोजन गरेकोमा कुल बजेटको १९ दशमलव ४७ प्रतिशत अर्थात १ अर्ब ५० करोड ९० लाख ६५ हजार फिर्ता भएको हो ।
कोष तथा लेखा नियन्त्रक कार्यालय लमजुङका अनुसार विकास निमार्णका लागि आएको पुँजीगततर्फको अधिकांश बजेट फिर्ता भएको हो । कर्मचारीको अपर्याप्तता, समयमै योजना कार्यान्वयनमा चासो नहुनु र कार्यालयहरूले समयमै काम गर्न नसक्दा जिल्लाबाट ठूलो रकम फिर्ता भएको बताइएको छ ।
स्थानीय तहवाहेक जिल्लाका विभिन्न सरकारी कार्यालयबाट कार्यान्वयन हुने गरी संघ र प्रदेश सरकारले विनियोजन गरेको कुल बजेटको ८० दशमलव ५३ प्रतिशत अर्थात ६ अर्ब २४ करोड १० लाख १४ हजार बजेट मात्र खर्च भएको कोष नियन्त्रक कार्यालयले जनाएको छ ।
निकासा भएको अधिकांश बजेट पनि आर्थिक वर्षको अन्त्यमा मात्र खर्च हुने गरेको छ । यता विषयगत कार्यालयहरूले भने केन्द्र र प्रदेशले ढिलो गरी बजेट पठाएका कारण पनि बजेट कार्यान्वयमा चुनौती देखिएको बताएका छन ।
२०७६ साउन २० गते प्रकाशित
वि.सं.२०७६ साउन २० सोमवार १६:०९ मा प्रकाशित
