काठमाडौं । अख्तियार दुरुपयोग अनुसन्धान आयोगको टोलीले डिभिजन सडक कार्यालय पोखराका प्रमुख एवं डिभिजन इञ्जिनीयर हरिकुमार पोखरेल सहित दुई जनालार्ई पक्राउ गरेको छ।
अख्तियारको टोलीले हिजो बिहीबार साँझ पोखरेलसहित कार्यालयका इञ्जिनीयर पवित्रमणि आचार्यलाई नगद नौ लाख सहित पक्राउ गरेको अख्तियार स्रोतले बताएको छ। सडक कार्यालय पोखरा अन्तर्गत सडक निर्माणको ठेक्का मिलाइदिने भनी पोखरेलले आफ्नै निवासमा निर्माण व्यवसायी ऋषि आचार्यसँग रकम बुझ्दै गरेको अवस्थामा उनीहरु पक्राउ परेको अख्तियार स्रोतले बताएको छ।
आयोग पोखराका प्रमुख काशीराज दाहालले सडक डिभिजन कार्यालय पोखराका प्रमुख सहितलाई पक्राउ गरिएको पुष्टि गरे पनि रकम भने यकिन हुन बाँकी रहेको बताए साथै अहिले अनुसन्धानकै क्रममा रहेकाले सबै कुरा सार्वजनिक गर्न नमिल्ने समेत उनको भनाई रहेको छ ।
२०७६ साउन २४ गते प्रकाशित
वि.सं.२०७६ साउन २४ शुक्रवार १२:०७ मा प्रकाशित
