काठमाडौं । नेपाली सेनाले सबै नेपालका जिल्लामा सैनिक विद्यालय संञ्चालन गर्ने भएको छ । सेनाको कल्याणकारी योजना निर्देशनालयले शुक्रबार पत्रकार सम्मेलन गरी सबै जिल्लामा सैनिक विद्यालय सञ्चालन गर्ने तयारी गरिएको जनाएको हो ।
पत्रकार सम्मेलनमा निर्देशनालयका निर्देशक सागर केसीले सबै प्रदेशहरुमा सैनिक स्कुलहरुको स्थापना गर्ने नीति अनुरुप प्रदेश–२ अन्तर्गत महोत्तरीको बर्दिवासमा स्कुल निर्माण कार्य सम्पन्न भइसकेको र प्रदेश–५ मासमेत विद्यालय स्थापनाको प्रक्रियाअघि बढेको जानकारी दिए ।
उनले सेनाले आफ्ना हितकारीका सन्ततीलाई बसोबास गरेकै क्षेत्रमा अध्ययन सुविधा उपलब्ध गराउन उद्देश्यले ७७ वटै जिल्लामा स्कुलको व्यवस्था गर्ने बताए । निर्देशनालयले कोषअन्तर्गत सञ्चालित विद्यालय महाविद्यालयहरुमा शिक्षाको गुणस्तर अभिवृद्धि गर्न, शिक्षण र सिकाइमा नविनतम् प्रविधिको प्रयोग गरी सबै कक्षाहरुमा मल्टिमिडिया प्रोजेक्टर लगायत अन्य प्रविधिहरुको व्यवस्था गरी स्तरोन्नतीको व्यवस्था गर्ने योजना अघि सारेको छ ।
निर्देशनालयले काठमाडौं उपत्यकाभित्र कार्यरत महिला सैनिकका सन्तानलाई लक्षित गरी छाउनीस्थित रेञ्जर रेजिमेन्ट परिसरमा मण्टेश्वर विद्यालयको निर्माण कार्य सुरु गरेको छ ।
वहालवाला तथा अवकाश प्राप्त सैनिक र तिनमा आश्रित परिवारहरुलाई कोषले २०३४ सालदेखि निःशुल्क स्वास्थ्य उपचार सुविधा उपलब्ध गराउँदै आएको छ । त्यसैगरी शिक्षा तथा सिप र स्वरोजगार मुलुक विभिन्न कार्यक्रमहरु निर्देशनालयले संचालन गर्दै आएको छ ।
२०७६ साउन २४ गते प्रकाशित
वि.सं.२०७६ साउन २४ शुक्रवार १७:२७ मा प्रकाशित