काठमाडौं । स्वास्थ्य तथा जनसंख्या मन्त्रालयअन्तर्गतका २० हजार कर्मचारीले अझै समायोजनपत्र बुझेका छैनन । हाल सेवामा २७ हजार चार सय १७ स्वास्थ्यकर्मी छन ।
तीमध्ये गत महिना सात हजार कर्मचारीले मात्रै समायोजनपत्र बुझेका छन । त्यसैले स्वास्थ्यकर्मीको समायोजनले पूर्णता पाउन अझै लामो समय लाग्ने देखिएको छ ।
समायोजनमा चित्त नबुझेको भन्दै सात हजारभन्दा बढी कर्मचारीले गुनासो फारम भरेका छन । आफूलाई पायक पर्ने ठाउँमा जान पाउनुपर्ने ती कर्मचारीको जिकिर छ । ती गुनासोका सुनुवाइ हुन बाँकी रहेको मन्त्रालयका वरिष्ठ जनस्वास्थ्य प्रशासक शम्भु काफ्लेले जानकारी दिनुभएको छ । गुनासो भर्नेको समायोजन पनि बाँकी रहेको उहाँले बताउनुभयो ।
काफ्लेका अनुसार चौथो, पाँचौँ र छैटौँ तहका स्वास्थ्यकर्मीको समायोजन रोकिएको छ । मन्त्रालयअन्तर्गत अनमि र अहेव मात्रै २१ हजार छन । गुनासो भर्नेमध्ये धेरैजसो अनमि र अहेव नै छन ।
उनीहरूको समायोजन रोकिएकाले अन्य १३ हजार कर्मचारीले समेत पत्र पाउन सकेका छैनन । गुनासो दर्ता गर्ने र नगर्ने बाँकी कर्मचारीलाई एकैपटक पत्र दिने भएको खबर नयाँ पत्रिका छापिएको छ ।
२०७६ भदौ २ गते प्रकाशित
वि.सं.२०७६ भदौ २ सोमवार ०८:०० मा प्रकाशित