काठमाडौं । हिमालयन जनरल इन्सुरेन्सले असोज ६ गते २५ औं वार्षिक साधारण सभा बोलाएको छ । साधारण सभा कार्की ब्यांकेट, बबरमहल काठमाडौंमा बिहान ११.३० बजे सुरु हुनेछ ।
कम्पनीले आव २०७४/ ७५ को नाफाबाट सेयरधनीलाई कुनै लाभांश वितरण नगर्ने भएको छ । बिमा कम्पनीले नियमनकारी निकायले गरेको व्यवस्था अनुसार एनएफआरएस पद्धतिबाट वित्तीय विवरण तयार पार्दा जगेडा कोष तथा अन्य व्यवस्थाहरु कायम गर्नुपर्ने भएकाले आव २०७४/७५ को नाफाबाट लगानीकर्तालाई लाभांश वितरण गर्न नसकिएको कम्पनीले जनाएको छ ।
सभामा सञ्चालक समितिमा संस्थापक समूहबाट ३ जना र सर्वसाधारणबाट २ गरी कूल ५ जनाको प्रतिनिधित्व हुने व्यवस्था मिलाउन नियमावली संशोधन गरिने प्रस्ताव पनि हुनेछ ।
आव २०७४/७५ को वार्षिक प्रतिवेदन पारित गर्ने प्रस्ताव पनि छ । आर्व २०७६/७७ का लागि लेखापरीक्षक नियुक्त गरी पारिश्रमिक निर्धारण गर्ने एजेन्डा पनि छ ।
सभा प्रयोजनका लागि हिमालयनले भदौ १७ गतेदेखि सभा हुने दिनसम्म बुक क्लोज गर्नेछ । यस आधारमा भदौ १६ गतेसम्म कायम सेयरधनी मात्र सभामा भाग लिन सक्नेछन ।
हाल हिमालयनको चुक्ता पुँजी १ अर्ब २ करोड ७२ लाख रुपैयाँ रहेको छ । असार मसान्त सम्ममा कम्पनीले १९ करोड ८५ लाख रुपैयाँ नाफा कमाएको छ । प्रतिसेयर आम्दानी १९ रुपैयाँ ३३ पैसा, प्रतिसेयर नेटवर्थ १७४ रुपैयाँ १० पैसा छ ।
२०७६ भदौ १० गते प्रकाशित
वि.सं.२०७६ भदौ १० मंगलवार ०८:५१ मा प्रकाशित
