बागलुङ। आदर्श सञ्चार सहकारी संस्था लिमिटेड बागलुङले संस्थाका शेयर सदस्यका परिवारको सदस्यको निधनमा प्रदान गरिने मृत्यु राहत रकम प्रदान गरेको छ ।
बागलुङ नगरपालिका वडानं. २ निवासी संस्थाका शेयर सदस्य राम शर्माकी आमा तथा शेयर सदस्य पूर्णकला शर्माकी सासुआमा हेमकुमारी शर्माको निधन भएकोमा श्रद्धाञ्जली अर्पण गर्दै मृत्यु राहत रकम हस्तान्तरण गरेको हो ।
संस्थाका अध्यक्ष हुमाकुमारी जिसी अञ्जु, उपाध्यक्ष अनन्तबहादुर खड्का, सचिव ललिता थापा लगायतले मृतकका छोरी मन्दिरा शर्मालाई रकम हस्तान्तरण गर्नु भएको थियो ।
संस्थाले प्रत्येक सदस्यका तर्फबाट परिवारका सदस्यको निधनमा ५ हजार तथा सदस्यको नै निधन भएमा १५ हजार रुपैया प्रदान गर्दै आइरहेको छ । श्रद्धाञ्जली कार्यक्रमको सञ्चालन संस्थाका सञ्चालक कमल लामिछानेले गर्नु भएको थियो ।
संस्थाले सञ्चालन गर्दै आइरहेको सदस्य राहत तथा दैवीप्रकोप उद्धारकोषबाट शेयर सदस्यहरु र सदस्यका परिवारको निधनमा मृत्यु राहत रकम प्रदान गर्दै आएको छ ।
साविक धौलागिरि अञ्चलको पहिलो सञ्चार सहकारीका रुपमा स्थापित आदर्श सञ्चार सहकारी संस्थाले स्थापनाकालदेखि दैनिक पत्रिका, साप्ताहिक पत्रिका प्रकाशनका साथै धौलागिरि टेलिभिजन सञ्चालनमा साझेदारी, सहकारी र पत्रकारिता सम्बन्धी विभिन्न खाले तालिम तथा सचेतनामुलक कार्यक्रम तथा सामाजिक रुपान्तरणका क्षेत्रमा विविध काम गर्दै आइरहेको छ ।
संस्थाले भदौ २१ गते १३ वार्षिक साधारणसभा आयोजना गरेको र उक्त साधारणसभाकै दिनदेखि आदर्शसञ्चार डटकम अनलाईन समेत सञ्चालन गर्न लागेको संस्थाका कार्यकारी सम्पादक दिल शिरिषले जानकारी दिनुभयो । संस्थामा हाल १ हजार ४ सय जना शेयर सदस्य, ३ करोड १० लाख शेयर पूँजि, १६ करोड बचत, १८ करोड कर्जा लगानी रहेको छ ।
संस्थाले बनाएको १० वर्षे रणनीतिक योजना अनुसार २०८० सालसम्म संस्थाको कार्यक्षेत्र विस्तार गरी गण्डकी प्रदेश स्तरीय बनाउनुका साथै ५ हजार भन्दा बढी शेयर सदस्य, ५२ करोड बचत, ५५ करोड कर्जा लगानी गर्ने लक्ष्य रहेको संस्थाका प्रवन्धक दिपकराज सापकोटाले जानकारी दिनुभयो ।
२०७६ भदौ १६ गते प्रकाशित
वि.सं.२०७६ भदौ १६ सोमवार ०९:५३ मा प्रकाशित