मकवानपुर । चर्चित सञ्चारकर्मी रवि लामिछानेविरुद्ध उच्च सरकारी वकिलको कार्यालय हेटौँडाले हिरासतमा राखेर अनुसन्धान गर्न माग गर्दै दिएको निवेदनमा सुनुवाई सकिएको छ ।
उच्च अदालत पाटनको हेटौँडा इजलासका न्यायाधीश टेकराज नेपालको एकल इजलासले रवि लामिछानेले दिएको निवेदन र उच्च सरकारी वकिलको कार्यालय हेटौँडाले दिएको निवेदन एकै दिन पेश गर्न आदेश दिएको प्रवक्ता अमृत घिमिरेले जानकारी दिनुभयो ।
उच्च सरकारी वकिलको कार्यालयले पत्रकार शालिकराम पुडासैनीको आत्महत्या प्रकरणमा लामिछाने, पत्रकार युवराज कंडेल र अस्मिता कार्कीलाई हिरासतमै राखेर अनुसन्धान गर्नुपर्ने भन्दै सोमवार निवेदन दर्ता गरेको थियो ।
निवेदनमा मंगलबार सुनुवाई गर्दै हेटौँडा इजलासले यसअघिको आदेश अनुसार जिल्ला अदालत चितवनको फाइल आइसकेकाले बिहीबारको पेशीमा दुवै फाइल पेश गर्न आदेश दिएको इजलासका रजिष्ट्रार विकास श्रेष्ठले जानकारी दिनुभयो ।
बिहीबारको इजलासमा लामिछानेले दिएको निवेदन र सरकारी वकिलको कार्यालयले दिएको निवेदनमा सुनुवाई हुनेछ । चितवन जिल्ला अदालतको आदेशमा धरौटीमा छुटेका लामिछाने र कंडेल आफूहरु साधारण तारिखमा रिहा हुनुपर्ने भन्दै जिल्ला अदालत चितवनको आदेश विरुद्ध उच्च अदालत पाटनको हेटौँडा इजलाशमा पुगेका थिए ।
पत्रकार पुडासैनीलाई आत्महत्याको दुरुत्साहन आरोप लागेका लामिछाने पाँच लाख रुपैयाँ र कंडेललाई तीन लाख रुपैयाँ धरौटीमा चितवन जिल्ला अदालतले भदौ ९ गते रिहा गरेको थियो ।
यसअघि लामिछाने र कंडेलको निवेदनमा सुनुवाई गर्दै पाटन उच्च अदालतको हेटौँडा इजलाशले चितवन जिल्ला अदालतबाट सक्कल फाइल मगाउने आदेश जारी गरेको थियो ।
निवेदनको प्रारम्भिक सुनुवाईको क्रममा मगाईएको प्रतिवेदन सोमवार उच्च अदालत हेटौँडामा पुगेको छ । अब बिहीबार यी दुवै निवेदनमा सुनुवाई हुने हेटौँडा इजलासका प्रवक्ता घिमिरेले जानकारी दिनुभयो ।
२०७६ भदौ २४ गते प्रकाशित
वि.सं.२०७६ भदौ २४ मंगलवार १३:२९ मा प्रकाशित
