काठमाडौ । लामो समयपछि सेयर बजारमा उछाल आएको छ । साताको तेस्रो दिन मङ्गलबार सेयर बजार २७ अङ्कले बढेको छ ।
आइतबार र सोमबार गरी झन्डै ३४ अङ्कले घटेको बजार मङ्गलबार बढेर लगानीकर्तालाई केही राहत दिएको छ । मङ्गलबार नेप्से परिसूचक बढेर १ हजार १५० अङ्कमा पुगेको छ ।
अर्थमन्त्री डा. युवराज खतिवडाले सेयर बजारमा लगानीका लागि आह्वान गरेपछि बजारले गति लिएको हो । कर्मचारी सञ्चय कोषको ५८ औं वार्षिकोत्वसलाई मङ्गलबार बिहान सम्बोधन गर्दै अर्थमन्त्री खतिवडाले सेयर बजार निरन्तर ओरालो लागेकाले लगानी बढाउन आह्वान गरेलगतै बजारमा हरियाली छाएको हो ।
मङ्गलबार ३८ करोड ३९ लाख ५७ हजार रुपैयाँ बराबरका १३ लाख ७७ हजार ९४६ कित्ता सेयर किनबेच भएको छ ।
सिद्धार्थ बैङ्क र नेपाल बैङ्कको सबैभन्दा बढी कारोबार भएको छ ।
सिद्धार्थको प्रतिकित्ता ३२५ रुपैयाँमा ३ करोड ४७ लाख ७७ हजार रुपैयाँ र नेपाल बैङ्कको प्रतिकित्ता ३१७ रुपैयाँमा २ करोड ९७ रुपैयाँ बरारबको सेयर किनबेच भएको छ ।
सिद्धार्थले मङ्गलबार लाभांश प्रस्ताव गरेपछि लगानीकर्ता झुम्मिएका हुन । सिद्धार्थले गत आर्थिक वर्षमा गरेको नाफाबाट सेयरधनीलाई २५ प्रतिशत लाभांशको प्रस्ताव गरेको छ ।
सेयर बजार बढेका बेला शिवम् सिमेन्ट लिमिटेड, गुराँश लघुवित्त वित्तीय संस्था, अपी पावर कम्पनी लिमिटेड र राधी विद्युत कम्पनीका लगानीकर्ताले कमाएका छन ।
यस्तै कर्णाली विकास बैङ्क, अरुण कावेली पावर लिमिटेड र मिथिला लघुवित्त वित्तीय संस्था र हिमालयन डिस्टिलरी लिमिटेडका लगानीकर्ताले पनि कमाएका छन ।
२०७६ भदौ ३१ गते प्रकाशित
वि.सं.२०७६ भदौ ३१ मंगलवार १६:१३ मा प्रकाशित
