२०७६ असोज २६ गते प्रकाशित
काठमाडौं । सानिमा बैंकको २१.०५२ प्रतिशत लाभांश पारित गर्न बुधबार (असोज २९ गते) साधारण सभा बोलाएको छ । बैंकले गत वर्षको नाफाबाट ११.०५२ प्रतिशत नगद र १० प्रतिशत बोनस सेयर वितरण गर्न लागेको हो ।
साधारण सभा प्रयोजनका लागि बैंकले असोज १३ गतेदेखि बुक क्लोज गरेको छ । असोज १२ गतेसम्म कायम सेयरधनीले लाभांश पाउनेछन । साधारण सभा, नक्साल ब्यांकेट, नाराणचौर, काठमाडौंमा बिहान ११ बजे सुरु हुनेछ ।
सभामा २०७५/७६ को वार्षिक प्रतिवेदन तथा नाफा नोक्सान हिसाबकिताब प्रतिवेदनमा छलफल गरी पारित गर्ने एजेन्डा पनि रहेको छ ।
आगामी वर्षको लागि लेखापरीक्षक नियुक्ति गरी पारिश्रमिक तोक्ने एजेन्डा पनि छ । कुनै उपयुक्त बैंक वा वित्तीय संस्थामा मर्जर वा एक्विजिसनमा जानु परेमा आवश्यक सम्झौता गर्न सञ्चालक समितिलाई अख्तियारी प्रदान गर्ने प्रस्ताव पनि हुनेछ ।
हाल सानिमाको चुक्ता पुँजी ८ अर्ब १२ लाख ५५ हजार ४४० रुपैयाँ छ । बोनस वितरणपछि पुँजी ८ अर्ब ८० करोड १३ लाख ८० हजार ९८४ रुपैयाँ पुग्नेछ ।
असार मसान्तसम्म सानिमाले २ अर्ब २४ करोड ३३ लाख रुपैयाँ खुद नाफा कमाएको छ । यसको प्रतिसेयर आम्दानी २८ रुपैयाँ ०४ पैसा र प्रतिसेयर नेटवर्थ १४८ रुपैयाँ ७३ पैसा छ ।
वि.सं.२०७६ असोज २६ आइतवार १४:४२ मा प्रकाशित
