काठमाडौं । सल्यानमा एक वडाध्यक्षले राजीनामा दिएर शिक्षण पेशा सुरु गरेका छन् । सिद्धकुमाख गाउँपालिका–४ का वडाध्यक्ष दिनेशकुमार बुढामगरले वडाध्यक्ष पदबाट राजीनामा दिएर प्राथमिक तहको शिक्षकको जागिर सुरु गरेका हुन् ।
०७४ को स्थानीयतहको निर्वाचनमा कांग्रेसको तर्फबाट निर्वाचित बुढामगरले शिक्षक सेवा आयोगले लिएको प्राथमिक तहको खुला कोटामा मुस्ताङबाट नाम निकालेर पढाउन थालेका हुन ।
तत्कालीन नेकपा एमालेको तर्फबाट वडाध्यक्षका उम्मेदवार देवेन्द्र रोका र बुढामगरले समान ३२१ मत प्राप्त गरेपछि गोलाप्रथाद्वारा बुढामगर निर्वा्चित भएका थिए ।
शिक्षक सेवा आयोगले लिएको लिखित र मौखिक परीक्षा उतीर्ण गरेपछि उनले वडाध्यक्ष पद त्यागेर मुस्ताङमा बसेर पठनपाठन सुरु गरेका हुन् ।
‘वडाध्यक्षमा न त अधिकार छ, न सुविधा नै, जनताको लागि केही गर्न नसकिने भएपछि पद ओगटेर मात्र के काम भनेर शिक्षण पेशा रोजेँ’, बुढामगरले भने ।
आगामी दिनमा राजनीतिमा नफर्किने उनले बताए । ‘अब विद्यार्थीलाई आफूसँगको ज्ञान सिकाउँछु, शैक्षिक गुणस्तर सुधारका लागि सेवा गर्न चाहान्छु,’ उनले भने ।
उनले गत बुधबार गाउँपालिकामा आएर राजीनामा दिएका छन । सोही दिन गाउँ कार्यपालिकाको बैठकले बुढामगरको राजीनामा स्वीकृत गर्दै ज्येष्ठ वडासदस्य वीरबहादुर खड्कालाई कार्यवाहक वडाध्यक्षको जिम्मेवारी दिएको गाउँपालिका अध्यक्ष चित्रबहादुर चलाउनेले जानकारी दिए ।
२०७६ मंसिर ०२ गते प्रकाशित
वि.सं.२०७६ मंसिर २ सोमवार ०९:५३ मा प्रकाशित