काठमाडौं । माछापुच्छ्रे बैंकबाट पनि १० लाख रुपैयाँ चोरी भएको पुष्टी भएको छ । नक्कली हस्ताक्षर र कागजातको प्रयोगबाट काठमाडौंका बैंकमा भएको चोरीमा थप १० लाख रुपैयाँ अभियुक्त समूहको हातमा पुगेको देखिएको हो ।
काठमाडौं प्रहरी परिसर, टेकुले प्रकरणमा संलग्न भएको आरोपमा बुधबार ६ जनालाई सार्वजनिक गर्दै १९ लाख ९ हजार रुपैयाँ चोरी भएको सार्वजनिक गरेको थियो । तर, अनुसन्धान अधिकृतलाई साँझ माछापुच्छ्रे बैंकबाट पनि १० लाख रुपैयाँ निकालिएको सूचना प्राप्त भएको जनाईएको छ ।
कसको खाताबाट रकम झिकिएको छ भन्ने विषयलाई केन्द्रमा राखेर अनुसन्धान भइरहे पनि प्रारम्भमा एउटै समूहले रकम निकालेको भेटिएको अनुसन्धान अधिकृतले बताएका छन।
प्रहरीले काभ्रेका सुभाष श्रेष्ठ, कुमार तामाङ, मनिष घिमिरे, अन्जन बराल, बाग्लुङका सुमन पौडेल र सिन्धुपाल्चोकका गोविन्द घिमिरेलाई पक्राउ गरेका छन।
आइतबार चोरिएको १९ लाख बढी रकम भने जनता बैंकका खातावाल गोपालमान राजवाहकको भएको काठमाडौं प्रहरीका डीएसपी होविन्द्र बोगटीले बताएका छन।
प्रहरीले उनीहरुको साथबाट १८ लाख ५० हजार रुपैयाँ बरामद गरेको छ । त्यस्तै विभिन्न व्यक्तिको नागरिकताको प्रतिलिपि २९० पाना, रजिष्टर २६ वटा, हस्ताक्षरको नमूना र दुई वटा डायरी, फोटो ८ सय २५ वटा पनि बरामद गरेको छ । यसबारे प्रहरीले विस्तृत अध्ययन गरिरहेको छ ।
२०७६ मंसिर १२ गते प्रकाशित
वि.सं.२०७६ मंसिर १२ बिहीवार ०८:५५ मा प्रकाशित