काठमाडौं । राष्ट्रिय गौरवका आयोजना भन्दै ठूला आयोजना कार्यान्वयन गरेको एक दशकपछि सरकारले ’गेम चेन्जर’ आयोजनाको सूची तयार गर्न लागेको छ ।
राष्ट्रिय योजना आयोगले पूर्वाधार विकास र सामाजिक क्षेत्रसँग सम्बन्धित ९ क्षेत्रका रणनीतिक आयोजनालाई ’गेम चेन्जर’ आयोजनाका रुपमा छनोट गरी कार्यान्वन अघि बढाउन लागेको हो।
योजना आयोगले त्यस्ता आयोजना छनौटका लागि सोमबार सम्पूर्ण सरोकारवाला मन्त्रालयका प्रतिनिधिसहितको छलफल गरेको छ ।
आयोगले मानव पुँजी निर्माण र उद्यमशीलता, विद्युत र हरित अर्थतन्त्र, यातायात र सूचना प्रविधि तथा पूर्वाधार, उत्पादकत्व विकास, पर्यटन, सहीकरण, प्रादेशिक र स्थानीय अर्थतन्त्रको विकास, सामाजिक सुरक्षा र सुशासन गरी ९ वटा क्षेत्रसँग सम्बन्धित यस्ता आयोजना छनोट गरी कार्यान्वयन गर्न लागेको हो।
पूर्वाधार विकासमा ढिलाइ भएपछि तत्कालीन् प्रधानमन्त्री डा बाबुराम भट्टराईले राष्ट्रिय गौरवका आयोजना घोषणा गर्दै तिनीहरुलाई रणनीतिकरुपमा कार्यान्वयन अघि बढाउने घोषणा गरेका थिए ।
भट्टराईले सुरुमा १८ वटा आयोजना छनोट गरेकोमा अहिले अमेरिकी सहयोगको मिलिनियम च्यालेन्ज कर्पोरेसनमार्फत कार्यान्वयन हुनेसमेत गरी २५ वटा आयोजनालाई राष्ट्रिय गौरवका आयोजनाको मान्यता दिइएको छ ।
योजना आयोगले सम्बन्धित मन्त्रालयका उच्च अधिकारी र विभागीय प्रमुखसमेतसँगको छलफलपछि त्यस्ता आयोजना छनोट गर्नेछ ।
२०७६ मंसिर १६ गते प्रकाशित
वि.सं.२०७६ मंसिर १६ सोमवार १४:५५ मा प्रकाशित
