काठमाडौं । राष्ट्रिय वाणिज्य बैंकको अध्यक्षमा पूर्वसहसचिव निर्मलहरि अधिकारी चयन भएका छन ।
वाणिज्य बैंक सञ्चालक समितिले अध्यक्ष चयन गरेसँगै अधिकारीले सोमबार नेपाल राष्ट्र बैंकका गभर्नर डा चिरञ्जिवी नेपालसँग पद तथा गोपनियताको सपथ ग्रहण गरेका छन ।
असोज २० गते सेवा निवृत्त भएका अधिकारीलाई सरकारले बैंकको सञ्चालक समितिको अध्यक्षता गर्ने गरी सदस्य पदमा नियुक्त गरेको थियो ।
अर्थ मन्त्रालयले सञ्चालकमा नियुक्त गरेसँगै बैंक सञ्चालक समितिको बैठकले अध्यक्षमा अधिकारीलाई चयन गर्ने निर्णय गरेको थियो । सञ्चालक समितिको बैठकबाट अध्यक्ष चयन भएपछि उनले गभर्नरसँग सपथ लिएका हुन् ।
अधिकारी अर्थ मन्त्रालयको सहसचिव रहँदा पनि यही बैंकको सञ्चालक समितिको सदस्य थिए । जनप्रशासन र नेपालीमा स्नातकोत्तर अधिकारीले अर्थशास्त्रमा स्नातक गरेका छन् । सरकारी सेवामा करिब ३९ वर्ष बिताएका अधिकारी बजेट र राजस्व प्रशासनमा दख्खल राख्ने कर्मचारीका रुपमा चिनिन्थे ।
राष्ट्रिय वाणिज्य बैंक र एनआइडिसी डेभलपमेन्ट बैंक मर्ज भएपछि सरकारले तत्कालीन सचिव महेन्द्रमान गुरुङलाई बैंक सञ्चालक समितिको अध्यक्ष बनाएको थियो । गुरुङले केही समयअघि अवकाश पाएपछि रिक्त स्थानमा अधिकारीलाई ल्याइएको हो ।
२०७६ मंसिर १७ गते प्रकाशित
वि.सं.२०७६ मंसिर १७ मंगलवार १५:२८ मा प्रकाशित