काठमाडौं । मुक्तिनाथ विकास बैंकको अवितरित हकप्रद शेयर लिलामी प्रक्रियाबाट विक्री गरी बाँडफाँट भएको छ । कम्पनीले हकप्रद शेयर निष्कासनको क्रममा विक्री हुन नसकेको संस्थापक तर्फको १ लाख २ हजार ५१६ दशमलव ३२ कित्ता र सर्वसाधारण तर्फको ३ लाख ७०३ दशमलव ९३ कित्ता शेयर लिलामी प्रक्रियाबाट वितरण गरेको हो ।
मंसिर ८ गतेदेखि १५ गतेसम्म शिलबन्दी बोलपत्र आव्हान गरी मंसिर १८ गते बोलपत्र दाताहरुको रोहवरमा शेयर बाँडफाँट भएको हो ।संस्थापकतर्फको शेयरका लागि प्रतिशेयर मूल्य रू.१५० दशमलव शून्य ७ र सर्वसाधारण समूह तर्फको लागि रू.२९१ मूल्य राखी बोलपत्र पेश गर्नेहरुलाई शेयर बाँडफाँट गरिएको हो ।
यस बाँडफाँटमा नपरेका आवेदकहरुको शेयर वापतको रकम भुक्तानी बैंक खाता उपलब्ध भएकाहरुको हकमा मंसिर २२ गतेदेखि आईपीएस मार्फत बैंक खातामा रकमान्तर गरिने कम्पनीले जानकारी दिएको छ ।
विक्री प्रबन्धकमा मुक्तिनाथ क्यापिटल लिमिटेड रहेको छ । हाल रू.३ अर्ब ६ करोड ४७ लाख ६० हजार रहेको कम्पनीको २० प्रतिशत हकप्रद विक्री पश्चात रू.३ अर्ब ६७ करोड ७७ लाख १२ हजार पुगेको छ ।
बाँडफाँट भएको २० प्रतिशत हकप्रद भने नेपाल स्टक एक्सचेञ्ज (नेप्से) मा सूचीकृत भएपछि मात्र कारोबार गर्न सकिनेछ ।
२०७६ मंसिर २० गते प्रकाशित
वि.सं.२०७६ मंसिर २० शुक्रवार १३:१९ मा प्रकाशित