काठमाडौं । दुबइको मस्रेक बैंकले नेपाली बैंकहरूसँग लगानी बढाउने भएको छ । गत साता मात्रै माछापुच्छ्रे बैंकलाई एक करोड डलर ऋण दिएको मस्रेकले अब लक्ष्मी बैंकलाई ऋण दिने भएको छ ।
मस्रेकका नेपालस्थित प्रतिनिधि कार्यालयका नायव प्रमुख कार्यकारी पृथ्वी श्रेष्ठले भने ’हामी अरू केही बैंकहरू पनि हेरिरहेका छौंं,’ ’चाँडै यस बारेमा निर्णय हुन्छ ।’
चाँडै लक्ष्मी बैंकलाई पनि ऋण उपलब्ध गराउने जानकारी दिँदै अन्य बैंकहरूलाई पनि पैसा उपलब्ध गराउने श्रेष्ठले बताए । बैंकिङ प्रणालीमा तरलता अभाव भएपछि नेपाल राष्ट्र बैंकले गत वर्ष विदेशी बैंकबाट ऋण लिन पाउने ब्यवस्था गरेको थियो । चालु वर्षदेखि विदेशी संस्थाबाट पनि पैसा ल्याउन पाइने ब्यवस्था गरिएको थियो ।
राष्ट्र बैंकले कुल प्राथमिक पुँजीको शतप्रतिशत रकम विदेशबाट ऋण ल्याएर नेपालमा लगानी गर्न पाउने व्यवस्था गरेको छ । यही व्यवस्था टेकेर बैंकहरूले विदेशबाट ऋण ल्याउने प्रक्रिया अगाडि बढाउन थालेका हुन ।
’पहिलो चरणमा भएकाले हामीले सुरुवात एक करोड डलरबाट गरेका हौंं,’ श्रेष्ठले भने, ’आवश्यकता हेरेर रकम बढाउन सकिन्छ ।’
२०७६ पुस १७ गते प्रकाशित
वि.सं.२०७६ पुस १७ बिहीवार १२:४२ मा प्रकाशित
