२०७६ पुस २० गते प्रकाशित
काठमाडौं । बैंकर्स संघको नयाँ कार्यसमितिले पदभार ग्रहण गरेको छ । पोखरामा आयोजना गरिएको एक कार्यक्रममा भुवन दाहालको नेतृत्वमा चयन नयाँ कार्य समितिले पदभार ग्रहण गरेको हो ।
सानिमा बैंकका प्रमुख कार्यकारी अधिकृतसमेत रहेका दाहालको नेतृत्वमा गत महिना नयाँ कार्यसमिति सर्वसम्मतले चयन भए पनि पदभार ग्रहण भएको थिएन । ज्ञानेन्द्र ढुंगानाको समितिको पदावधि महिना दिन बाँकी रहेकाले निर्वाचित भए पनि नयाँले पदभार ग्रहण गर्न पाएको थिएन ।
संघको उपाध्यक्षमा अनुकूल भटनागर चयन भएका थिए । उनी नेपाल एसबीआई बैंकका प्रमुख कार्यकारी अधिकृत हुन् । संघमा सदस्य गोविन्द गुरुङ, रमेशराज अर्याल र सुमन शर्माबाहेक सबै नयाँ अनुहार आएका छन् ।
संघको सदस्यमा सनराइज बैंकका प्रमुख कार्यकारी अधिकृत जनक शर्मा पौड्याल, एनएमबी बैंकका प्रमुख कार्यकारी अधिकृत सुनिल केसी, मेगा बैंककी प्रमुख कार्यकारी अधिकृत अनुपमा खुन्जेली र नेपाल बैंकका प्रमुख कार्यकारी अधिकृत कृष्णबहादुर अधिकारी चयन भएका छन् ।
वि.सं.२०७६ पुस २० आइतवार १०:०५ मा प्रकाशित
