काठमाडौ । विश्वमा तीन करोडभन्दा बढी चेलिबेटी बेचबिखनको सिकार बन्ने गरेको तथ्य सार्वजनिक भएको छ । चेलिबेटी बेचबिखनविरुद्ध राष्ट्रिय समूह (एनएनएजिटी) को चौँथो राष्ट्रिय सम्मेलनमा राष्ट्रिय मानवअधिकार आयोगका प्रमुख आयुक्त अनुपराज शर्माले दैनिक लाखौं नेपाली चेलिबेटी बेचबिखनको सिकार बन्दै आएको बताए । त्यसलाई रोक्न मानवअधिकार आयोग दृढ भएर लागेको उनले सुनाए । चेलिबेटी बेचबिखन सीमानाकाबाट बढी हुने हुँदा यसलाई रोक्न नेपाल प्रहरीको सक्रियता बढाउनु जरुरी रहेको उनको भनाई थियो ।
समूहका सल्लाहकार भारती सिलवालले नयाँ दिल्ली, हङकङ, तिब्बतमा धेरै चेलिबेटीको बेचबिखन हुने गरेको बताउँदै भूकम्पको समयमा नेपालमा धेरै चेलिबेटी बेचबिखनमा परेको भन्दै उनले स्मरण गराए ।
समूहका संस्थापक अध्यक्ष दुर्गा घिमिरेले नक्कली बिहेको नाउँमा नेपाली चेलिबेटी बेचबिखन भइरहेको बताएका थिए ।
संस्थाकी अध्यक्ष डा उषा पोखरेलले गरिबीका कारण चेलिबेटी बेचबिखन फस्टाउँदै गएको बताउँदै यसलाई नियन्त्रण गर्न सबै पक्ष एक हुनु जरुरी रहेको खाँचो औंल्याईन् ।
कार्यक्रममा महिला र बालबालिकाको अधिकारका क्षेत्रमा काम गर्दै आएका अधिकारकर्मी दुर्गा घिमिरे र चितवन जिल्लाका जिल्ला न्यायाधीश टेकनारायण कुँवरलाई सम्मान गरिएको थियो ।
प्रकाशित मिति : २०७३ भदौ १२
वि.सं.२०७३ भदौ १२ आइतवार १८:१४ मा प्रकाशित