काठमाण्डौं । बुढीगण्डकी जलविद्युत आयोजना विकास समितिले आयोजना प्रभावितहरुलाई मुआब्जा लिन डाकेको छ। आयोजनाले धादिङका १३ गाविसका प्रभावित वासिन्दालाई मुआब्जा वितरण गर्न लागेको हो।
पहिलो चरणमा सलाङ, मैदी र खरी गाविसका वासिन्दालाई मुआब्जा लिन बोलाएको हो। बाक्लो बस्ती र मुल मोटरवाटोसँग जोडिएका जग्गाको मूल्यांकन प्रति रोपनी ८ लाख ३५ हजार रुपैयाँ गरिएको छ। मोटरबाटोसँग जोडिएका जग्गाहरुको मूल्यांकन ८ लाख चार हजार रुपैयाँ गरिएको छ।
अन्य घरवस्ती क्षेत्र र सहायक मोटर बाटोमा पर्ने जग्गाधनीले प्रति रोपनी ७ लाख ७३ हजार रुपैयाँ पाउने छन्। अब्बल खेतको सात लाख ४२ हजार, दोयम खेतको सात लाख ११ हजार, सीम खेतको ६ लाख ८० हजार र चाहार खेतको ६ लाख ४९ हजार रुपैयाँका दरले मुआब्जा वितरण गरिने छ।
आयोजनाले अब्ल बारीका लागि ६ लाख १८ हजार, दोयम बारीको ५ लाख ७८ हजार, सीम बारीको ५ लाख ५६ हजार र चाहार बारीको ५ लाख २५ हजार रुपैयाँ मूल्यांकन गरेको छ। पाँच रोपनीसम्म जग्गा भएकाहरु पुरै विस्थापित भएमा १५ प्रतिशत वढि रकम पाउने छन्। १० रोपनीसम्म जग्गा हुनेहरु पुरै विस्थापित भएमा थप १० प्रतिशत रकम पाउने छन्।
आयोजनाले मुआब्जाका लागि घर, खेत, रुख विरुवालगायत ११ वटा वर्गीकरण गरी पैसा उपलब्ध गराउन लागेको हो।
२१ पुस २०७३, १२।००
वि.सं.२०७३ पुस २१ बिहीवार १२:४५ मा प्रकाशित