काठमाडौ । अमेरिकी राष्ट्रपति डोनाल्ड ट्रम्पले सिरियाविरुद्धको कारबाहीमा रुसले दिएको प्रतिक्रिया निकै निराशाजनक भएको बताएका छन् । उनले सिरियाको सैन्य हवाई अड्डामा अमेरिकाले गरेको मिसाइल आक्रमण जायज भएकोसमेत बताएका छन् ।
सिरियामा भइरहेको गृह युद्ध तत्काल रोक्नु पर्नेमा उनले जोड दिएका छन् । नेटोको महासचिव जेन्स स्टाल्टेनवर्गसँग संयुक्त प्रेस सम्मेलनमा राष्ट्रपति ट्रम्पले सिरियामा भएको नागरिकको नरसंहार रोक्न ढिला भइसकेको भन्दै तत्काल गृहयुद्ध अन्त्य गरिनुपर्ने बताए ।
उनले सिरियाका राष्ट्रपति बसर अल असदलाई ‘कसाइ’को संज्ञा पनि दिएका छन् । गएको हप्ता सिरियाली शासकले रासायनिक आक्रमण गरी आफ्नै देशका नागरिकको हत्या गरेकाले अमेरिकाले चेतावनी स्वरुप सिरियामा मिसाइल आक्रमण गरेको उनको भनाई छ ।
यस्तै उनले आफू नेटो सेनाको पक्षमा रहेको भन्दै अफगान र इराकी सहयोगिको मद्धतमा नेटोले अझै धेरै काम गर्नुपर्नेमा जोड दिएका छन् ।
प्रकाशित मिति २०७३ चैत ३१
वि.सं.२०७३ चैत ३१ बिहीवार १४:२० मा प्रकाशित