काठमाडौ । डोपिङ अर्थात प्रतिबन्धित शक्तिबर्धक औषधि प्रयोग गरेका कारण प्रतिबन्धमा पर्ने खेलाडीको संख्या १४ प्रतिशतले बढेको देखिएको छ । विश्व एन्टी–डोपिङ एजेन्सी (वाडा) का अनुसार सन् २०१५ मा १९ सय भन्दा धेरै खेलाडी डोपिङका कारण प्रतिबन्धमा परेको जनाएको छ । यो अघिल्लो वर्षको तुलनामा १४ प्रतिशत बढी हो ।
सन् २०१५ मा १९ सय २९ जना खेलाडी डोपिङमा असफल भएर प्रतिबन्धमा परेको वाडाको प्रतिवेदनमा उल्लेख छ । सन् २०१४ मा डोपिङमा असफल भएका कारण १६ सय ९३ खेलाडी प्रतिबन्धमा परेका थिए ।
अनुसन्धान आएको तीव्रता, सूचना संकलन तथा विश्व समुदायको ध्यानाकर्षणका कारण कारवाहीको दायरामा आउने खेलाडीको संख्या बढेको वाडाले जनाएको छ ।
पछिल्लो प्रतिवेदनले अनुसन्धानात्म कार्यमा सुधार भएको देखिने वाडाले दाबी गरेको छ । सन् २०१५ मा डोपिङमा असफल हुने खेलाडीमा सबै भन्दा धेरै रुसका छन् । रुसका एक सय ७६ खेलाडी डोपिङमा असफल भएका छन् ।
प्रकाशित मितिः २०७३ चैत २२
वि.सं.२०७३ चैत २२ मंगलवार १५:५७ मा प्रकाशित