काठमाडौ। स्थानीय चुनावका लागि आवश्यक पर्ने १ करोड ६० लाख मतपत्रको ढुवानी र सुरक्षाको जिम्मा नेपाली सेनाले लिने निर्वाचन आयोगले जनाएको छ ।
आयोगले हालसम्म ६२ जिल्लाको मतपत्र छापिसकेको छ । अब त्यसलाई ब्याण्डिङ गरेपछि विभिन्न जिल्लामा सुरक्षासहित पुर्याउने जिम्मा सेनालाई दिइने प्रमुख निर्वाचन आयुक्त अयोधीप्रसाद यादवले जानकारी दिए ।
संसदीय समिति अन्तरगत राज्य व्यवस्था समितिलाई आइतबार बिहान निर्वाचन सुरक्षाबारे प्रमुख आयुक्त यादवले जानकारी गराएका छन् । समितिमा बोल्दै यादवले स्थानीय चुनावमा ६४ प्रकारका सामाग्री आवश्यक पर्ने बताए । यी मध्ये मतपत्रको सुरक्षा सेनाले गर्ने र अन्य ६३ सामाग्रीको सुरक्षा प्रहरीले गर्ने उनले बताए ।
स्थानीय चुनावका लागि चीनले १२ प्रकारका सामाग्री सहयोग गरेको यादवले राज्य व्यवस्था समितिलाई बताए । साथै भारतबाट आउने सामाग्रीको प्रक्रिया अघि बढेको उनले बताए ।प्रमुख आयुक्तका अनुसार हालसम्म ३० हजार मत पेटिका आइसकेका छन् । बाँकी आउने प्रक्रियामा छन् ।
यसैवीच आइतबारदेखि ७५ वटै जिल्लामा मुख्य निर्वाचन अधिकृतको कार्यालय स्थापना हुने आयोगले जानकारी गराएको छ ।
प्रकाशित मितिः २०७४ बैशाख ३
वि.सं.२०७४ वैशाख ३ आइतवार ११:५८ मा प्रकाशित
