चिलीका मिडफिल्डर अटुरो भिडालले विश्व फुटबलको प्रशासकीय निकाय फिफाले अर्जेन्टिनाका स्ट्राइकर लियोनल मेस्सीलाई विशेष सुविधा दिएको आरोप लगाएका छन् । विश्व फुटबलको प्रशासकीय निकाय फिफाको अपिल कमिटीले मेस्सीमाथि लागेको चार खेलको प्रतिबन्ध हटाउने निर्णय गरेपछि भिडाललेको यस्तो प्रतिक्रिया आएको हो ।
गएको मार्चमा विश्वकप २०१८ को छनौट अन्तर्गत चिलीसँगको खेलमा खेल पदाधिकारीलाई अपशब्द बोलेकोमा मेस्सीमाथि चार खेलको प्रतिबन्ध लागेको थियो । तर फिफाको अपिल कमिटीले मेस्सीको व्यवहार कारवाही गर्नुपर्ने खालको नरहेको बताएर प्रतिबन्ध हटाएको हो । चिलीका मिडफिल्डर भिडालले मेस्सी राम्रो खेलाडी रहेको र उनलाई राष्ट्रिय टिमबाट खेलेको देख्न पाउनु राम्रो कुरा रहेको बताए । फिफाले उनलाई प्रतिबन्ध फुकुवा गर्नु राम्रो रहेको छ । तर यो सबै खेलाडीका लागि समान हुने पर्ने उनको भनाई छ ।
फिफाले ठूला खेलाडीका लागि एउटा र अरुलाई अर्को नियम बनाउने गरेको उनको आरोप छ । नियम सबैका लागि समान हुनु पर्नेमा फिफाले असमान व्यवहार गर्ने गरेको र मेस्सीको प्रतिबन्ध फुकाउन उनलाई विशेष छुट दिएको भिडालको आरोप छ । प्रतिबन्ध लागेपछि भएको एक खेल मेस्सीले गुमाए । चिलीलाई १–० ले हराएको अर्जेन्टिना त्यसपछि मेस्सी बिना खेलेको खेलमा बोलिभियासँग २–० ले पराजित भयो ।
प्रतिबन्ध फुकुवा भएपछि मेस्सीले अब विश्वकप छनौट अन्तर्गत उरुग्वे, भेनेजुएला र पेरुसँगको खेल खेल्न पाउने भएका छन् । अर्जेन्टिना रुसमा हुने विश्वकपमा स्थान बनाउनका लागि संघर्षरत छ । बोलिभियासँगको हारपछि अर्जेन्टिना १० देश सहभागी दक्षिण अमेरिकी क्षेत्रको छनौटको पाँचौं स्थानमा झरेको छ ।
प्रकाशित मितिः २०७४ बैशाख २४
वि.सं.२०७४ वैशाख २४ आइतवार १४:०० मा प्रकाशित
