काठमाण्डौं । फरवार्ड कम्युनिटी माइक्रोफाइनान्सले निष्काशन गरेको साधारण सेयरका लागि आस्बा बाहेकको सामान्य प्रणालीबाट दुई दिनमा एक अर्ब बढीको आवेदन परेको छ । माइक्रोफाइनान्सको सेयर निष्काशन तथा बिक्री प्रबन्धक नबिल इन्भेष्टमेण्ट बैंकिंगका अनुसार आस्बाको तथ्यांक भने आउन बाँकी नै छ ।
नेपाल धितोपत्र बोर्डले कार्यान्वायनमा ल्याएको आस्बा लागु भए पछि पहिलो पटक निष्काशन भएको साधारण सेयरमा सामान्य प्रकृयाबाट १० हजार बढी आवेदनबाट एक अर्ब बढीको आवेदन परेको नबिल इन्भेष्टले जनाएको छ । उसका अनुसार आस्बाको तथ्यांक सेयर निष्काशन बन्द भए पछि मात्र आउने छ ।
माइक्रोफाइनान्सले गत आइतबारदेखि निष्काशन गरेको छ लाख कित्ता साधारण सेयर आज बुधबारबाट बन्द हुँदैछ । एक सय रुपैयाँ अंकित मूल्यको यो आइपीओमा न्यूनतम ५० कित्ता र अधिकतम तीन हजार कित्तासम्मका लागि आवेदन दिनु पर्ने हुन्छ ।
सुनसरीको दुहबीमा केन्द्रीय कार्यालय रहेको संस्थाले निष्काशित सेयर मध्ये ३० हजार कित्ता कर्मचारीलाई छुट्याइएको छ भने ३० हजार कित्ता सामूहिक लगानी कोषहरुलाई छुट्याइएको छ । बाँकी पाँच लाख ४० हजार कित्ता सेयरका लागि सर्वसाधारण लगानीकर्ताले आवेदन गर्नु पर्ने हुन्छ ।
माइक्रोफाइनान्सको आईपिओमा आस्बा प्रणालीबाट बाहेक लगानीकर्ताले नबिल इन्भेष्टमेन्ट बैंकिङ लिमिटेडको कार्यालय नक्साल, फरवार्ड कम्युनिटी माइक्रोफाइनान्स वित्तीय संस्थाको मुख्य कार्यालय सुनसरी, दुबही तथा फरवार्डको अधिकांश शाखा कार्यालयबाट पनि आवेदन फारम लिन र बुझाउन सकिने व्यबस्था छ । यसैगरी, एभरेष्ट बैंक लिमिटेडको उपत्यकाको न्यूरोड, नयाँ बानेश्वर, पुल्चोक ललितपुर, भक्तपुरमा फारम भर्न सकिनेछ । उपत्यका बाहिर पोखरा, वीरगञ्ज, जनकपुर, हेटौडा, नारायणगढ, चितवन, तथा बुटवल शाखा कार्यालयबाट पनि फाराम लिन र बुझाउन सकिनेछ ।
१२ माघ २०७३, ११।००
वि.सं.२०७३ माघ १२ बुधवार १२:०९ मा प्रकाशित