काठमाडौ । फरवार्ड कम्युनिटी माइक्रोफाइनान्स बित्तीय संस्था लिमिटेडले जारी गरेको आईपिओको बाँडफाँड शुक्रबार गरिएको छ । संस्थाले हालै जारी गरेको ६ लाख कित्ता आईपिओ काठमाडौँको नक्सालस्थित नवील इन्भेष्टमेन्ट बैंकिङ लिमिटेड परिसरमा बाँडफाँड गरिएको हो ।
न्यूनतम ५ हजारदेखि अधिकतम एक लाख तीन हजारसम्मको आवेदन दिएका लगानीकर्तालाई गोलाप्रथाबाट सेयर बाँडफाँड गरिएको विक्री प्रबन्धक नविल इन्भेष्टमेन्टले जनाएको छ । नविलका अनुसार चिठ्ठा पर्ने प्रत्येकले १० कित्ताका दरले पाएका छन् । न्यूनतम एक लाख चार हजारदेखि तीन लाख रुपैयाँसम्मको आवेदन दिने लगानीकर्तालाई भने ०.८९ प्रतिशत कित्ता समानुपातिक ढंगले वितरण गरिएको छ ।
कम्पनीको आईपिओमा कुल एक लाख २४ हजार सात सय २५ वटा आवेदन परेको थियो । न्यूनतम ५० देखि अधिकतम ५ कित्तासम्मका लागि विनियोजित सेयरमा १०९ गुणा बढी आवेदन परेको थियो । यस्तै, न्यूनतम ५१० देखि ३ हजारसम्मको वर्गमा ११२ गुणा बढी आवेदन परेको थियो । कुल आवेदकमध्ये, ३८ हजार आठ आवेदकले मात्रै आईपिओ पाएका हुन् । नविलका अनुसार, दुई हजार ६२ आवेदन रद्द भएका थिए ।
जारी गरिएको कुल छ लाख कित्ता सेयरमध्ये, पाँच लाख ४० हजार कित्ता सेयर सर्वसाधारण आवेदकका लागि छुट्याइएको थियो । कर्मचारीका लागि ३० हजार कित्ता र म्युुचुुअल फण्डहरुका लागि बाँकी ३० हजार कित्ता छुट्याइएको थियो ।
प्रकाशित मितिः २०७३ फागुन २१
वि.सं.२०७३ फागुन २१ शनिवार १३:०२ मा प्रकाशित