काठमाडौ । संस्कृति, पर्यटन तथा नागरिक उडड्यनमन्त्री जीवनबहादुर शाहीले मन्त्रालयअन्तर्गतका राष्ट्रिय गौरवका आयोजनाको काम द्रुतगतिमा अगाडि बढाउन निर्देशन दिएका छन् । आर्थिक वर्ष २०७३/०७४ मा सञ्चालित आयोजना तथा कार्यक्रमको प्रथम चौमासिक प्रगति समीक्षा तथा मन्त्रालयस्तरीय विकास समस्या समाधान समितिको बैठकमा उनले निर्देशन दिएका हुन् ।
मन्त्री शाहीले अहिले सोचेअनुरुपले काम अगाडि बढ्न नसकेको भए तापनि अर्को चौमासिक समीक्षा बैठकमा तीन गुणाले परिणाममुखी र लक्ष्यकेन्द्रित काम अघि बढाउन निर्देशन दिए । “राष्ट्रिय गौरवका आयोजना जति चाँडो सम्पन्न हुन्छ, मुलुकको आर्थिक विकासले त्यति नै चाँडो फड्को मार्छ, त्यसैले राष्ट्रिय सङ्कल्पका साथ तोकिएको जिम्मेवारी पूरा गर्न लाग्नुपर्छ”– उनको भनाइ उद्धृत गर्दै उनका प्रेस सल्लाहकार सुनिल सापकोटाले जानकारी दिए ।
मन्त्री शाहीको अध्यक्षतामा बसेको बैठकमा पर्यटन मन्त्रालयका सचिव, विभागीय प्रमुख, महाशाखा प्रमुख, शाखा प्रमुख र मन्त्रालयअन्तर्गत निकायका प्रमुख र राष्ट्रिय योजना आयोगका पर्यटन मन्त्रालय हेर्ने सहसचिवको सहभागिता रहेको थियो ।
प्रकाशित मितिः २०७३ पुस १०
वि.सं.२०७३ पुस १० आइतवार २०:३५ मा प्रकाशित
