काठमाडौं । उमेरले डाँडा काटिसक्यो तर आँट भने तरुणको जस्तो । ७६ वर्षको उमेरमा करिब ३ सय ४० दिनमा सगरमाथा आरोहण गरी विश्व किर्तिमान कायम गर्न सफल मीन बहादुर शेरचनले फेरि सगरमाथा चढेर फर्केर आउने घोषणा गरेका छन् । उमेरले ८६ वर्ष पुगिसकेका शेरचनले राजधानीमा पत्रकार सम्मेलनको आयोजना गरि विश्व शान्तिको निम्ति आउँदो अप्रिलबाट फेरि सगरमाथा चढ्ने घोषणा गरेका हुन । उनले भने,‘यसअघि सगरमाथा चढ्दा मरेरै भएनि सगरमाथा चढ्छु भनेको थिए, अहिले म सगरमाथा चढेर पनि बाचेरै आउनेछु ।’
उनले आफ्नो उमेर कृत्रिम जस्तै रहेको बताए । ‘उमेरले मेरो साहसलाई रोक्दैन,मलाई लाग्छ मेरो यो उमेर त कृत्रिम हो ।’ उनले भने । उनले सबै मिलेर पृथ्वीको अस्तित्वलाई जोगाउनुपर्नेमा जोड दिए ।
मीन बहादुर शेरचन सगरमाथा आरोहणका संयोजक भापू क्यापटेन जीतबहादुर घर्तीमगरले शेरचनको आरोहणका निम्ति सहयोग गर्न सबैमा आग्रह गरे । उनले सरकारबाट साहसीक यात्राका निम्ति कुनै सहयोग नपाएको भन्दै गुनासो व्यक्त गरे ।
उनले भने,‘ आर्थिक साहयताको पनि खाँचो छ, सरकार रमिते छ, उहाँको साहसिक यात्रालाई टुंगोमा पुर्याउन देश विदेशमा रहेका सम्पूर्ण नेपालीले सहयोग गर्नुहुनेछ भन्ने आशा राख्छु ।’ कार्यक्रमको संयोजन न्यूज अभियान डट कमका प्रधान सम्पादक छायाचन्द्र भण्डारीले गरेका थिए ।
प्रकाशित मितिः २०७३ फागुन २६
वि.सं.२०७३ फागुन २६ बिहीवार १२:३१ मा प्रकाशित