भारतको मुम्बईमा मे २५ का दिन आयोजना हुन लागेको कार्यक्रममा प्रधानमन्त्री नरेन्द्र मोदीको हत्या गर्न लागको रहस्य खुलेको छ । मोदीको हत्याका लागि विदेशबाट एक भारतीय युवकलाई ५० करोड रुपैयाँको प्रस्ताव आएको रहस्य खुलेको हो ।
भारतको मध्यप्रदेशको सतना जिल्ला निवासी कुशल सोनीलाई विदेशबाट फोनमा मोदीको हत्याका लागि प्रस्ताव आएको प्रहरीलाई उद्धृत गर्दै भारतीय संचारमाध्यमले जनाएको छ । साथै हत्याका लागि ५० करोड रुपैयाँ इनाम दिने प्रस्ताव समेत आएको जनाइएका छ ।
कुशल सोनीको विस्तृत परिचय खुलाइएको छैन । तर उनले सुरुमा उक्त प्रस्तावलाई ठट्टाका रुपमा लिएको भए पनि पछि विषय गम्भीर लागेर प्रहरीलाई जानकारी गराएका थिए ।
उनले फोन कलको रेकर्डसमेत प्रहरीलाई बुझाएका छन् । उनलाई उक्त प्रस्ताव गर्ने व्यक्ति भारतीय नै भएको आशंका गरिएको छ ।
गुजराती भाषाको लयमा ती व्यक्तिले कुरा गरेका कारण विदेशमा बस्ने कुनै भारतीयले नै यस्तो प्रस्ताव गरेको अनुमान गरिएको हो । प्रहरीले साइबर सेललाई यस विषयमा थप छानविनका लागि परिचालन गरेको छ ।
प्रकाशित मितिः २०७४ जेठ ८
वि.सं.२०७४ जेठ ८ सोमवार १६:४२ मा प्रकाशित
