काठमाडौ । नेशनल लाइफ इन्स्योरेन्स कम्पनीले लगानीकर्तालाई २५ प्रतिशत बोनस सेयर दिने भएको छ । बिमा समितिले तोकेको चुक्ता पुँजी पुर्याउनेक्रममा कम्पनीले आर्थिक वर्ष २०७२/७३ को नाफाबाट २५ प्रतिशत बोनस सेयर दिने निर्णय गरेको हो ।
नेशनल लाइफले यसअघि आर्थिक वर्ष २०७१/७२ को नाफाबाट ३० प्रतिशत बोनस सेयर दिइसकेको छ । कम्पनीले यसअघि सोही ३० प्रतिशत बोनस सेयरपछि कायम हुने चुक्ता पुँजीमा एक सय प्रतिशत हकप्रद सेयर जारी गर्ने निर्णय गरेको थियो । तर बिमा समितिले निर्जीवन बिमा कम्पनीको चुक्ता पुँजी २ अर्ब मात्र पुर्याए हुने व्यवस्था गरेपछि कम्पनीले लगानीकर्तालाई फेरि २५ प्रतिशत बोनस सेयर दिने र यसअघि घोषणा गरिएको एक सय प्रतिशत हकप्रदको सट्टा अब ७५ प्रतिशतमात्र हकप्रद सेयर दिने निर्णय गरेको हो ।
यसआधारमा अब यसअघि एक सय प्रतिशत हकप्रद दिने भनेको ठाउँमा अब लगानीकर्ताले ७५ प्रतिशतमात्र हकप्रद भर्नैछन् । लगानीकर्ताले बाँकी २५ प्रतिशत बोनस सेयर नै पाउनेछन् । यसबाट लगानीकर्तालाई केही घाटा नहुने अझ बोनस दिइने भएकाले हकप्रदमा कम पैसा तिरे पुग्ने कम्पनीको भनाई छ ।
नेशनल लाइफ इन्स्योरेन्सका कम्पनी सचिव सुरेशप्रसाद खत्रीद्धारा जारी विज्ञप्तीअनुसार यसअघि एक सय प्रतिशत हकप्रद सेयर दिने घोषणा गरिएकोमा त्यसमा परिमार्जन गरी लगानीकर्तालाई २५ प्रतिशत बोनस सेयर दिने र बाँकी ७५ प्रतिशत मात्र हकप्रद जारी गर्ने निर्णय गरिएको छ । यसअनुसार लगानीकर्ताले सतप्रतिशत नै पाउने भएका छन् ।
कम्पनीको यो प्रस्तावलाई नियामक बिमा समिति र आगामी साधारण सभाले अनुमोदन गर्नुपर्नेछ ।
हेर्नुहोस् विज्ञप्ती
प्रकाशित मितिः २०७४ बैशाख ८
वि.सं.२०७४ वैशाख ८ शुक्रवार ०८:५२ मा प्रकाशित