काठमाडौ । संसदको लेखा समितिको शुक्रबार बसेको बैठकले नेपाल आयल निगमले पेट्रोल भण्डारणका लागि जग्गा किन्दा आर्थिक हिनामिना गरेको ठहर गर्दै अख्तियार दुरुपयोग अनुसन्धान आयोगलाई निगममाथि कारवाही गर्न निर्देशन दिएको छ । लेखा समितिले गरेको छानविनमा आयल निमगका अधिकारीले टेण्डरको नाममा कागज मिलाएर दलालसँग मिलेमतोमा जग्गा खरीद गरेको भनेको छ । जग्गा प्राप्तीको सरकारी कम्पनीको प्रक्रिया छलेर गोलमाल रुपमा टेण्डर गर्दै झण्डै १ अर्ब रुपैयाँ कुम्ल्याएको आरोप अहिले निगमका अधिकारीमाथि छ ।
लेखा समितिले जग्गा प्राप्ति ऐनबमोजिम खरिद गर्नुपर्नेमा निगमले टेण्डरबाट गरेको भन्दै अनियमितता भएको उसको ठहर छ । यस्तै सिधै जग्गाधनीबाट खरिद गर्नुपर्नेमा दलालबाट लिएको र सरकारी चलनचल्तीको भन्दा बढीमा जग्गा किनेको निश्कर्ष आधारित भएर कारवाही गर्न समितिले आयोगलाई निर्देशन दिएको हो ।
लेखा समितिले निगमले जग्गा किन्दा अपनाएको प्रक्रिया र जग्गा किन्दा स्थानीय क्षेत्रमा गरिएको सेटिङमाथिको छानविन गरेर दोषीलाई कारवाही गर्न अख्तियारलाई भनेको छ । अख्तियारले यसअघि नै आयल निगमबारे अनुसन्धान थालेको बताएको थियो ।
आयल निगमका प्रमुख गोपाल खड्कासहित आरोपित अधिकारी र विवादित प्रक्रियामा छानविन गरिरहेको अख्तियारले कसैलाई हचुवाका भरमा जेल हाल्न नसकिने बताएको छ । सुशासन समितिको बैठकमा अख्तियार प्रमुख दीप बस्न्यातले बाहिर आए जस्तो यो विषयमा हात बाँधेर बसेको भन्ने आरोप गलत भएको बताएका थिए ।
प्रकाशित मितिः २०७४ साउन २०
वि.सं.२०७४ साउन २० शुक्रवार १४:२० मा प्रकाशित
