काठमाण्डौं । मुलुकको ३९औं प्रधानमन्त्री पुष्पकमल दाहाल ‘प्रचण्ड’प्रधानमन्त्रीमा निर्वाचित भएको दिन आज दिन सेयर बजार १२.७५ अंकले घटेर १८१३.७२ अंकमा पुगेको छ ।
बजारका अधिकांश समूहहरु घटेपछि आज नेप्से रातो रंगले पोतिएको छ । यो साताको पहिलो दिनदेखि नै घटिरहेको नेप्से आज पनि घट्न पुगेको हो । यो दिन वाणिज्य बैंक समूहको सूचक साढे १३ अंकले घटेको छ । होटल समूहको १०.८९ अंकले, विकास बैंक समूहको ११ अकले, जलविद्यूत समूहको साढे १७ अंकले बीमा समूहको ३३.८२ अंकले, वित्त कम्पनी समूहको साढे १० अंकले, उत्पानमूलक समूहको ४१ र अन्य मसूहको सूचक ३.७६ अंकले घटेको नेपाल स्टक एक्सचेञ्जले जनाएको छ ।
आज स्टक एक्सचेञ्जमा १ सय २४ कम्पनीका २४ लाख ९९ हजार कित्ता सेयर एक अर्ब २८ करोड रुपैयाँमा किनबेच भएको छ ।
स्मरण रहोस् २०६५ भदौ १५ गते त्यसबेलासम्मकै उच्च ११७५ अंकमा रहेको नेप्से प्रचण्ड प्रधानमन्त्री भएकैबेला ०६५ फागुनमा घटेर ५ सय अंकको हाराहारीमा आएका थियो । अहिले पनि प्रचण्ड प्रधानमन्त्री हुने समय नजिकिँदै गर्दादेखि घटेको नेप्से प्रचण्ड प्रधानमन्त्री भएकै दिन पनि घटेर सुखद संकेत गरेन ।
१९ साउन २०७३, ३।४०
वि.सं.२०७३ साउन १९ बुधवार १६:५३ मा प्रकाशित
