काठमाण्डौं । राष्ट्रिय योजना आयोगले आगामी १४औँ त्रि–वर्षीय योजनाको मस्यौदालाई राष्ट्रिय विकास परिषद्मा छलफलका लागि पठाउने निर्णय गरेको छ ।
आयोगका अध्यक्षसमेत रहेका प्रधानमन्त्री केपी शर्मा ओलीको अध्यक्षतामा आज प्रधानमन्त्री निवास बालुवाटारमा बसेको बैठकले त्रि–वर्षीय योजना २०७३÷७४ देखि २०७५÷७६ को आधारपत्रलाई परिषद्मा छलफलका लागि पेश गर्न स्वीकृति दिएको हो ।
विज्ञहरुसहितको परिषद् बैठकले छलफल गरेर त्रि–वर्षीय योजनाको आधारपत्रलाई अनुमोदन गर्ने राष्ट्रिय योजना आयोगका उपाध्यक्ष डा युवराज खतिवडाले सञ्चारकर्मीलाई जानकारी दिए ।
उक्त आधारपत्रका आधारमा सरकारको आगामी नीति तथा कार्यक्रम तर्जुमा गरिने पनि उनले उल्लेख गरेका थिए । त्यस्तै, बैठकमा परिषद्का मनोनीत ३५ जना सदस्यबाट प्रस्ताव पेस भए पनि त्यसको परिमार्जनपछि मात्र टुङ्गो लगाउने निर्णय भएको प्रवक्ता गौतमले बताए ।
२० बैशाख २०७३, १.००
वि.सं.२०७३ वैशाख २० सोमवार १६:११ मा प्रकाशित