भक्तपुर । नेकपा (एमाले) का सचिव प्रदीप ज्ञवालीले मधेसवादी मोर्चाको जायज मागका बारेमा संविधान संशोधन भइसकेकाले अब नाजायज मागमा संविधान संशोधन आवश्यक नरहेको बताएका छन् ।
रफत सञ्चार क्लबले भक्तपुरमा आयोजना गरेको साक्षात्कारमा ज्ञवालीले जायज माग बाहेक केही नेताहरुको स्वार्थ पूरा गर्न संविधान संशोधनका लागि एमाले कदापि तयार नहुने बताए ।
मधेसी मोर्चाले राखेको संविधान संशोधनको माग मधेसी जनताको माग नभएको जिकिर गर्दै उनले अब फेरि संविधान संशोधन गर्नु गलत रहेको बताए ।
संविधान संशोधनका लागि नेपाली भूमिमा नभएर अन्य मुलुकमा छलफल हुनुले समेत मधेसी जनताको माग नभई केही नेताकै माग भएको उनको ठम्याई छ ।
विगतमै तीनै निर्वाचनको मिति तय भए पनि वर्तमान सरकारमा रहेको गठबन्धन विभिन्न बहानाबाजी गरी निर्वाचन नगर्ने खेलमा लागेको उनको आरोप थियो ।
निर्वाचन पर धकेल्दै संविधान कार्यान्यवन समेत नगर्ने षड्यन्त्र भइरहेको आशंका गर्दै उनले ओली नेतृत्वको सरकारले गरेका काम र निर्णयलाई वर्तमान सरकारले उल्टाउँदा राजनीतिक दलबीचको दूरी बढ्ने र राजनीतिक द्वन्द्व चर्कने भन्दै त्यसो नगर्न चेतावनी दिए ।
प्रकाशित मितिः २०७३ भदौ १४
वि.सं.२०७३ भदौ १४ मंगलवार १८:४४ मा प्रकाशित
