काठमाण्डौं । सडक विस्तार पीडित सङ्घर्ष समितिले काठमाडौँ उपत्यकाका विभिन्न स्थानमा भइरहेको सडक विस्तारका क्रममा पीडितलाई क्षतिपूर्ति उपलब्ध गराउन माग गर्दै माइतीघर मण्डलामा आज विहान विरोध प्रदर्शन गरेका छन् । परापूर्वकालदेखि बस्दै आएका स्थानीयवासीलाई बिना सूचना घर भत्काउने काम भइरहेको भन्दै पीडित संघर्ष समितिले विरोध प्रदर्शन गरेको हो ।
समितिका संयोजक सुमन सायमीले पछिल्लो पटक अदालतले पीडितलाई आवश्यक क्षतिपूर्ति उपलब्ध गराएर मात्र सडक विस्तारको कार्य अगाडि बढाउन सरकारलाई निर्देशन दिएको भए पनि काठमाडौँ उपत्यकाका विभिन्न २२ स्थानमा क्षतिपूर्ति उपलब्ध नगराईकन सडक विस्तार भइरहेको जानकारी दिए । समितिले क्षतीपूर्ति उपलब्ध गराएर मात्र सडक विस्तार गर्न माग गरेको छ ।
संयोजक सायमीले गैरन्यायिक तरिकाले भइरहेको सडक विस्तारको विकल्प खोज्नुपर्ने बताउँदै सरकारले स्थानीय जनतालाई लालपुर्जा दिएर जनताको जग्गा अतिक्रमण गरिरहेको दावी गरे । त्रिपुरेश्वर, कालीमाटी, कलङ्की क्षेत्रमा अहिले डोजर लगाएर आतङ्क मच्चाएको भन्दै उनीहरुले स्थानीय जनतासँग समझदारीमा सडक विस्तार गर्नुपर्ने माग गरेका छन् ।
१२ फागुन २०७३, रासस, ११।००
वि.सं.२०७३ फागुन १२ बिहीवार ११:४४ मा प्रकाशित
