काठमाडौं । आन्तरिक तथा वाह्य दुबै किसिमको पर्यटन प्रबद्र्धन गर्दै आएको सोसाइटी अफ् ट्राभल एण्ड टूर अपरेटर्स (सोट्टो) नेपालको टोली वाह्य पर्यटन प्रबद्र्धनका लागि अहिले रसिया–फिनल्याण्ड सेल्स मिसन–२०१७ अभियानअन्तर्गत त्यहाँ रहेको छ ।
मार्च २४ देखि अप्रिल ५ सम्म अर्थात् १२ दिने सेल्स मिसनमा रसिया र फिनल्याण्डका विभिन्न सहरमा नेपाल प्रबद्र्धन गरिने सोट्टो–नेपालका महासचिव नारायण पराजुलीले जानकारी दिए । उनले रसियाको राजधानी मस्को, सेन्ट पिटर्सबर्ग र एकाटेरिङबर्गमा कार्यक्रम गरिने र फिनल्याण्डमा राजधानी हिलसिन्कीमा नेपालको पर्यटन प्रबद्र्धनसम्बन्धी कार्यक्रम राखिने बताए ।
उक्त टोलीले नेपाल प्रबद्र्धन गर्ने विभिन्न डिभिडी, ब्रोसर, पम्प्लेटका साथ विभिन्न कार्यक्रम गर्नेछन् ।उक्त प्रबद्र्धनात्मक कार्यक्रममा नेपाल पर्यटन बोर्डका प्रतिनिधिसहित २५ ट्राभल व्यवसायीहरुको सहभागिता रहेको छ ।
यसक्रममा एनआरएन, नेपाली राजदूतावासका प्रतिनिधिहरुलगायतसँग भेटघाट गरी नेपालको पर्यटन प्रबद्र्धनमा उनीहरुको सहभागीतालाई अझै उजागर गर्ने सोट्टो–नेपालका निवर्तमान अध्यक्ष यामबहादुर खड्काले बताए । सोही अवसरमा बीटूबी कार्यक्रमकोसमेत आयोजना गरिनेछ ।
प्रकाशित मितिः २०७३ चैत १२
वि.सं.२०७३ चैत १२ शनिवार १५:१० मा प्रकाशित