धादिङ । नेकपा एमाले धादिङले दुई वटै निर्वाचन क्षेत्रमा प्रतिनिधि सभा निर्वाचनका निम्ति उम्मेदवार छनोट कार्यक्रम आयोजना गरेको छ ।
क्षेत्र नं. १ को बैरेनी र क्षेत्र नं. २ को धादिङबेसीमा एमाले नेताहरु भेला भएका छन् ।
भेलाले मंसिर १० गते हुने प्रतिनिधि सभा निर्वाचनका निम्ति उम्मेदवार छनोट गरेर जिल्ला कमिटीमा पेश गर्नेगरी निर्णय गर्ने नेकपा एमालेका अध्यक्ष भुमी त्रिपाठीले जानकारी जानकारी दिए ।
क्षेत्र नं.१ मा पार्टी अध्यक्ष भुमी त्रिपाठी सहित पोलिटव्युरो सदस्य द्वय राजेन्द्र पाण्डे र गंगालाल तुलाधर र स्थायी कमिटी सदस्य एवं केन्द्रीय लेखा आयोगका अध्यक्ष प्रा. डा. पुष्पराज कंडेलको समेत निर्वाचन क्षेत्र भएकाले जिल्लाभरमै महत्त्वका साथ हेरिएको छ ।
यस्तै क्षेत्र नं. २ मा पार्टी केन्द्रीय सदस्य खेम लोहनी र वहालवाला सांसद गुरुप्रसाद बुर्लाकोटीको मुख्य प्रतिस्पर्धा रहेको बताइएको छ ।
भेलाले सकेसम्म सर्वसम्मत निर्णय गरेर एक जना मात्र सिफारिस गर्ने र सर्वसम्मत नभए तीन जनाको नाम केन्द्रमा सिफारिस गर्ने एमाले नेताहरुले बताए ।
प्रदेश सभाका निम्ति हिजै चार वटै क्षेत्रले बैठक गरेर आकांक्षीको नाम संकलन गरेर पार्टी जिल्ला कमिटीमा पेश गरिएको छ ।
१९ असोज २०७४
वि.सं.२०७४ असोज १९ बिहीवार १५:०८ मा प्रकाशित