काठमाण्डौं । वेष्टन डेभलपमेन्ट बैंकको हकप्रदमा नबिकेको दुई लाख २५ हजार छ सय ३५ कित्ता सेयर चैत १३ गतेदेखि लिलामीमा आउने भएको छ । जसमध्ये एक लाख ६३ हजार पाँच सय एक कित्ता संस्थापक सेयर छ भने ६२ हजार एक सय ३४ कित्ता साधारण सेयर रहेको छ ।
दाङको धोराहीमा प्रधान कार्यालय रहेको बैंकले कातिक एक गतेसम्म कायम सेयरधनीलाई शतप्रतिशत हकप्रद मंसिर २२ गतेदेखि माघ १२ गतेसम्म बेचेको थियो । हकप्रदमा पुरै सेयर नबिकेपछि लिलामी मार्फत विक्री गर्न लागिएको हो ।
बैंकको सेयर निष्काशन तथा विक्री प्रवन्धक प्रभू क्यापिटल रहेको छ । ईच्छुक लगानीकर्ताले न्युनतम एक सय रुपैयाँमाथि अंकित मूल्य राखेर दश कित्ताको गुणांकमा प्रभू क्यापिटलमा आवेदन गर्नुपर्नेछ । आवेदकले न्युनतम एक सय कित्तादेखि अधिकतम कित्ताका लागि चैत २१ गतेसम्म आवेदन गर्न सक्नेछन् । कम्पनीले बोलकबोल नतिजा विक्री प्रवन्धकको कार्यालय कमलादीमा चैत २४ गते ११ बजे खोल्ने जाएको छ ।
बैंकले एक सय रुपैँया दरका १५ लाख ६९ हजार छ सय कित्ता हकप्रद सेयर जारी गरेको थियो । बैंकले निष्काशन गरेको हकप्रद मध्ये नौं हजार चार सय ४९ जना सेयरधनीलाई १३ लाख ४३ हजार नौं सय ६५ कित्ता हकप्रद बैंकको सञ्चालक समितिले उक्त हकप्रद फागुन ११ गते बाँडफाँड गरेको जनाएको छ ।
२७ फागुन २०७३, ११।००
वि.सं.२०७३ फागुन २७ शुक्रवार ११:४८ मा प्रकाशित
