काठमाडौं । पाँचतारे सांग्रिला होटलले जाडो मौषमलाई ख्याल गर्दै ग्याकोक तिब्तीयन खाना ल्याएको छ । यो खानाको इतिहास एक हजार वर्षभन्दा पुरानो रहेको पाइन्छ ।
विशेषत यो खानालाई पारिवारिक खानाको रुपमा हेर्ने गरिन्छ । जाडोको बेला चीनमा डिनर नै ग्याकोक हुने गर्छ, सांग्रीला होटेलका सेल्स एण्ड मार्केटिङ ग्रुपका म्यानेजर फुर्वा शेर्पाले भने, ‘नेपालमा हामीले गत वर्षदेखि ग्याकोकको शुरुवात गरेका हौँ । विदेशी मात्र होइन स्वदेशी पनि ग्याकोकप्रति निकै लोभिएका छन् ।’ ग्याकोक खानामा विशेषत माछा, चिकेन, मटन र सुप रहेका हुन्छन् । त्यस्तै, क्याबेज, स्पिन्च, हरियो प्याज, बोक्चे, मसरुप, काउली रहन्छन्, जसले ग्याकोकलाई निकै स्वादिलो बनाउँछ । ग्याकोक भनेकै एक खालको सुप हो । यी सबैलाई उमालिएको हुन्छ । जसको सुप निकै स्वादिलो हुन्छ ।
जापानीजहरू ग्याकोक फ्यान भएको शेर्पाको भनाई छ । उनका अनुसार ग्याकोक भएन भने जापानीजहरुलाई सांग्रीलाको बसाई शून्य लाग्दोरहेछ, उनीहरु यस्तै बताउँछन् ।
ग्याकोक भेज र ननभेज दुवै परिकारमा उपलब्ध रहेको सांग्रीलाले जनाएको छ । सांग्रीलाले ग्याकोकका लागि ग्राहकले करिव दुई घण्टा अगाडि अर्डर गर्नुपर्ने बताएको छ ।
खुल्ला चौरमा आगो ताप्दै ग्याकोकको मजा लिन सक्ने व्यवस्था पनि छ । शुक्रबार र शनिबार बाहेकको दिनमा ग्याकोक उपलब्ध गराउने सांग्रिलाले जनाएको छ ।
नेपालीहरू चाईनिज खानाका निकै पारखी छन् । पछिल्लो समय ग्याकोक प्रति पनि नेपालीहरुको रुची बढ्दै जान थालेको छ । यसैले सांग्रिला होटलदेखि अन्य केही रेष्टूरेण्टहरुले पनि ग्याकोक तयार गर्न शुरू गरिसकेका छन् ।
वि.सं.२०७२ मंसिर १७ बिहीवार १८:०० मा प्रकाशित
