काठमाडौ । जलवायु परिवर्तनका कारण उत्पन्न समस्या समाधानका लागि फ्रान्सको राजधानी पेरिसमा भएको सम्मेलनमा एक सय ९५ देशबीच सम्झौता भएको छ ।
लामो छलफल र विवादपछि सम्झौता भएको हो । र्कार्बन उत्सर्जन कटौती गर्न जलवायु परिवर्तन सम्मेलनमा सहभागी सबै देश सहमत भएका छन् ।
सम्झौताका मुख्य विषय
सबै देशले कार्बन उत्सर्जनमा छिटो भन्दा छिटो कमी ल्याउने ।
ग्रीन हाउस ग्यास तथा त्यसको स्रोचका बीच सन् २०२० सम्ममा सन्तुलन कायम गर्ने ।
विश्वको तापक्रम १ दशमलव ५ डिग्री सेल्सियसमा सीमित गर्न प्रयास गर्ने ।
हरेक पाँच वर्षमा जलवायु परिवर्तनको असर कम गर्न भएका प्रयासको समिक्षा गर्ने
सन् २०२० सम्ममा कार्बन उत्सर्जन कम गराउनका लागि विकासशील देशलाई हरेक वर्ष एक खर्ब अमेरिकी डलर सहयोग गर्ने । जसलाई बढाउन पनि सकिने छ ।
जलवायु परिवर्तन सम्झौतामा सबै देशले आउँदो वर्षको अप्रिल २२ मा औपचारिक रुपमा हस्ताक्षर गर्ने ।
विश्वका धेरै नेताले यो सम्झौतालाई ऐतिहासिक सम्झौता भनेका छन् । अमेरिकाका राष्ट्रपति बाराक ओबामले सम्झौता मानिसको आफ्नै ग्रह पृथ्वी जोगाउने राम्रो अवसर रहेको बताएका छन् । उनले यो सम्झौता कार्बन उत्सर्जन कम गर्नका लागि महत्वपूर्ण विन्दु बन्ने बताए ।
चीनले पनि सम्झौताको स्वागत गरेको छ । चीन विश्वको सबै भन्दा प्रदुषित मुलुक हो । तर वातावरण संरक्षकर्मीले भने यो सम्झौता महत्वपूर्ण रहेपनि पृथ्वीको सुरक्षाका लागि पर्याप्त भने नरहेको बताएका छन् ।
पेरिसमा दुई हप्ता लामो सम्मेलनपछि सम्झौता तयार भएको हो ।
वि.सं.२०७२ मंसिर २८ सोमवार १२:५० मा प्रकाशित
