काठमाडौं । सरकारले दोस्रो जनआन्दोलनका दोषि दुर्जकुमार राईलाई सशस्त्र प्रहरीको कायम मुकायम महानिरीक्षकको जिम्मेवारी दिएको छ । भ्रष्टाचार अभियोग लागेका सशस्त्र प्रहरी महानिरीक्षक कोषराज वन्तलाई निलम्बन गर्दै सरकारले एआईजी राईलाई कायम मुकायम महानिरीक्षकको जिम्मेवारी दिएको हो ।
मन्त्रिपरिषदको शुक्रबारको बैठकले एआइजी दुर्जकुमार राईलाई कामू महानिरीक्षकको जिम्मेवारी दिने निर्णय गरेको हो । कार्यवाहक आइजीपीका लागि राईसँगै एआइजीहरु जीवन थापा र कृष्णकुमार तामाङ दौडमा थिए ।
अहिले कोषराज निलम्बनमा परेपछि कामु पाएका रार्इ आगामी चैतमा आइजीपी बन्ने छन् ।
मन्त्रिपरिषद्को शुक्रबार राति अबेर सकिएको बैठकले वन्तले दिएको राजीनामा स्वीकृत गरेन । करोडौ भ्रष्टाचार गरेको भन्दै अख्तियारले वन्तलाई निलम्बन गर्न सिफारिस गरेको थियो । त्यसको भोलिपल्ट वन्तले राजीनामा दिए ।
तर मन्त्रिपरिषद् बैठकले वन्तले दिएको राजीनामा स्वीकृत नगरि अख्तियारको सिफारिस अनुसार निलम्बनको निर्णय गरेको हो । वन्तलाई तीन महिनालाई निलम्बन गर्ने निर्णय भएको हो ।
वन्तको कार्यकाल पनि चैत मसान्तसम्म मात्र थियो । कार्यकाल सकिन केही महिना मात्र बाँकी छँदा उनी निलम्बनमा परेका हुन् ।
वि.सं.२०७२ पुस ४ शनिवार ०७:०२ मा प्रकाशित
