काठमाडौं । वैशाख १२ को भूकम्पले धेरै नेपालीको मन हल्लायो, हजारौ मानिसले आफन्त गुमाए, लाखौंले धनसम्पत्ति गुमाए ।यसले नेपालको अर्थतन्त्रमा सिर्जना गरेको झट्का आम नेपालीले अझै बर्षौंसम्म भोगिरहने छौं ।
तर, गोरखाको बारपाकलाई केन्द्रविन्दु बनाएर गएको ७.८ रेक्टर स्केलको भूकम्पले हामीलाई मात्र हैन, बिश्वलाई हल्लाएको रहेछ भन्ने खुलाएको इन्टरनेट बादशाह गुगलले ।
सर्च इन्जिन गुगलले सन् २०१५ मा इन्टरनेटमा सर्वाधिक खोजी भएका विषयहरुको सूची सार्वजनिक गरेको छ । जसमा नेपालको भूकम्प पनि परेको छ ।
गूगलका अनुसार ‘नेपाल अर्थक्वेक’ ८ करोड ५० लाख पटक गूगल गरिएको छ । भूकम्पबारे सवैभन्दा धेरै गुगल गरिएको यो दोस्रो घटना हो । यसअघि जापानमा सन् २०११ मा भूकम्प जाँदा सबैभन्दा बढी गूगल गरिएको थियो ।
भूकम्पपछि विश्वभरबाट ‘म नेपाललाई कसरी सहयोग गर्न सक्छु’ भनेर धेरै पटक गूगल गरिएको छ । नेपालमा कसरी स्वयंसेवा गर्ने, कपडा दिने र कसरी पाल दिने भनेर बिश्वभरका सहयोगी मनहरुले गुगलमा खोजी गरेको पाइएको छ ।
ठाउँको कुरा गर्दा, भूकम्पपछि पोखराबारे धेरैले गूगलमा खोजी गरेका छन् । त्यसपछि मात्र राजधानी काठमाडौंबारे खोजी गरिएको देखिएको छ ।
नेपालमा भूकम्पको झड्का महसुस हुनासाथ कसरी बिश्वभर इन्टरनेटमा तरङ्ग फैलियो भन्नेबारे गुगलले रोचक टाइमलाइनसहितको इन्टरएक्टिभ म्याप बनाएको छ ।
वि.सं.२०७२ पुस ६ सोमवार ०६:५३ मा प्रकाशित
