श्रीहरि थापा
काठमाडौं । नेपाल आयल निगमको भण्डारण डिपो थानकोटमा शुक्रबार राती चार मन्त्रीले स्थलगत अनुगमन गरेका छन् ।
डिपोको भण्डारमा पर्याप्त तेल भएर पनि उपभोक्ताले नपाएको समाचार सार्वजनिक भएपछि चार मन्त्री सल्लाह गरेर स्थलगत निरिक्षणमा निस्किएका थिए । अर्थ मन्त्री विष्णु पौडेल, आपुर्ति मन्त्री गणेशमान पुन, गृह मन्त्री शक्ती बस्नेत र वातावरण मन्त्री विश्वेन्द्र पासवानले डिपोको भण्डारण स्थल र कार्यालयमा पुगेर अनुगमन गरेका हुन् ।
कार्मचारीलाई अग्रिम सूचना दिएर अनुगमनमा पुगेका मन्त्रीले डिपोमा पुगेर खासै उल्लेखनीय कुनै अनुगमनको काम गरेनन् । मन्त्रालयको काम सकेर सिंहदरवाबाट आयल निगमका हाकिमहरु र सुरक्षा गार्डलाई लावालस्कर लगाउँदै, साइरन बजाउँदै थानकोट पुगेका चार मध्ये आपुर्ति बाहेक तीन मन्त्री आधा घण्टा समय विताएर फर्किए । आपुर्ति मन्त्री गणेशमान पुन भने एक घण्टा बसेर निस्किएका हुन् ।
संगै आएका अरु मन्त्री हिडे पनि विभागिय मन्त्रीका हैसियतमा पुन कर्मचारीसंग तथ्यांक केलाउँदै थिए । वितरण भएको र मौज्दात रहेको विवरण लिएपछि मन्त्री पुनले अहिले आएको हाहाकार प्रति सरकार गम्भिर विकल्प खाज्दै गरेको बताए । मन्त्री पुनले निगमले चुस्त काम गर्न नसकेकोले समस्या बाहिर आएको बताए । निगमल् वितरण योजना बनाउन नसकेको मन्त्री पुनले बताए ।
डिपो प्रमुखले भने समयमा मन्त्रालयले निर्णय गर्न नसक्दा वितरणमा समस्या भएको बताए ।
वि.सं.२०७२ माघ ८ शुक्रवार २०:५० मा प्रकाशित
