काठमाडौं- प्रधानमन्त्री केपी शर्मा ओलीको चीन भ्रमणमा औपचारिक सम्झौता हुने भएपछी काठमाडौँ उपत्यकाको सडक सुहाउदा सार्वजनिक विद्युतिय बसको सम्भाव्यता अध्ययन गर्न काठमाडौं महानगरपालिकाबाट ४ सदस्य टोली चीन पुगेको छ। सरकारी तहकै पहलमा उनीहरुलाई बस उत्पादक कम्पनीहरुको अध्ययनमा टोली पुगेको हो।
काठमाडौं उपत्यकाको सडकको अवस्था अनुसार चल्ने बस, त्यसको व्यवस्थापन, सर्वसुलभ लगायतका कुराहरु बुझेर टोली केही दिनमा फर्किनेेछ। महानगरपालिकाको प्रशासन विभाग प्रमुख ज्ञानेन्द्र कार्कीको नेतृत्वमा राजस्व महाशाखा प्रमुख महेश काफ्ले, सार्वजनिक निजी साझेदारी कार्यक्रम प्रमुख शिव अधिकारी र प्राविधिक प्रमोद डंगोल अघिल्लो शनिवार सांघाइ पुगेका थिए।
‘सरकारी स्तरबाटै पहल भएकाले टोलीले काठमाडौं मैत्री विद्युतिय बसको अध्ययन गर्न पुगेको हो,’ महानगरपालिका प्रमुख तथा कार्यकारी अधिकृत रुद्रसिंह तामाङले भने, ‘उनीहरु आइसकेपछि बसको मूल्य र अवस्थाको आधारमा ल्याउँने प्रक्रिया सुरु हुन्छ। संभावना भए सरकारलाई पनि अनुरोध गर्छौ।’
प्रधानमन्त्रीका प्रमुख सल्लाकार विष्णु रिमालले पनि सरकारी पहलमै टोली पठाइएको हुनसक्ने संकेत दिए। परराष्ट्रमन्त्री समेत रहेका थापा चीन पुगेकै बेला भएका छलफलाई अनुकुल पार्न टोली पुगेको हुनसक्ने रिमालले बताएको नागरिकन्युजले खबर लेखेको छ।
